Әл-Фараби атындағы ҚазҰУ-дың құрылғанына 90 жыл толған мерейтойы аясында танымал түлектеріміздің жас білімгерлермен қауышуы құптарлық жайт екені белгілі.
Осы орайда, Қазақстан халқының тілдері мерекесіне және ұлт ұстазы Ахмет Байтұрсынұлының туған күніне орай, филология факультетінде Қазақ әдебиеті және әдебиет теориясы кафедрасының ұйымдастыруымен белгілі жазушы, ҚР Мемлекеттік сыйлығының иегері, факультет түлегі, тіл жанашыры Бексұлтан Нұржекеұлымен кездесу өтті. Оқырман жүрегінен кеңінен орын алған жазушы шығармашылығына қызыққан факультет ұжымы мен студенттері белсене қатысты.
Ахмет Байтұрсынұлының тіл білімі саласындағы орасан еңбегінің маңыздылығына тоқтала келіп, көрнекті қаламгер Бексұлтан Нұржекеұлы жиынға қатысушыларға тіл тазалығын бұзбау мен оны сақтаудың аса қажеттілігін түрлі мысал келтіре отырып түсіндірді. Жазушы тілдің құдіреттілігі, оның өміршеңдігі турасында біршама сөз қозғады. Қазақ тілінің, қазақ тіл білімінің өткені мен бүгінінің арасында айырмашылық барын, көптеген қателерді түзету ендігі жастардың, болашақ зерттеушілердің міндеті екенін алға тартты. Қазақ тілінің жалғамалы тілдердің қатарынан, яғни бастапқы түбір қосымша жалғанған кезде еш өзгеріссіз жазылуы тиіс. Алайда бүгінгі күнгі емленің ұлттық тіл заңдылығын, қолданысын сақтауда, келер ұрпаққа аманаттауда қыруар еңбек күтіп тұрғанын тілге тиек етті. Тілдегі орфографиялық, орфоэпиялық заңдылықтардың бұзылуына алаңдаушылығын жеткізді. Бүгінгі күні қазақтілді дикторлардың да тілдің әуезділігін сақтауға қосар үлесінің молдығын айтып өтті.
Бексұлтан Нұржекеұлы – әйел тақырыбында жиі қалам тербейтін жазушы. Көптеген туындыларына арқау болған да осы тақырып. Жазушының студенттер арасында жиі оқылатын «Бейтаныс әйелдің құпиясы», «Әй, дүние-ай!», «Бір өкініш, бір үміт» т.б. шығармалары да кездесуде тілге тиек етілді. Тарихи тұлғалар өмірінен сыр шерткен қаламгердің дерек пен дәйекті дұрыс сөйлетудің, ұлт тарихының қалың қатпарлы тұстарын зерттеу мен зерделеудің көкейкесті мәселелерін дұрыс пайымдаудың маңыздылығына тоқталды. Бексұлтан Нұржекеұлы студенттер алдында тарихқа да көз жүгіртті. Тарих сахнасынан орын алған түркітектес ұлы тұлғалардың тұрлаулы істері туралы пайымы көпшіліктің көңілінен шықты.
Жазушының жеке шығармашылық әлемі, ондағы кейіпкерлер тағдыры мен прототиптері жайлы да сөз қозғалмай қалған жоқ. Өзінің шығармалары туралы, қозғаған тақырыптары мен көтерген мәселелері жайлы, көркем шығарма жазудағы шеберліктің орны мен маңызы жөнінде айта келіп, болашақ ақын-жазушыларға ақыл-кеңесін де аямады. Жазушылыққа, шығармашылыққа қызыққан студенттер өз сұрақтарын емін-еркін қоя білді, оған жазушы тарапынан тұшымды жауап берілді.
Шоқан ШОРТАНБАЙ,
Қазақ әдебиеті және әдебиет теориясы кафедрасының
аға оқытушысы
Айсұлу ОРЫНБАСАР,
«Әдебиеттану» мамандығының
3-курс студенті
Басқа жаңалықтар
