Әдеби мұраның тұрақты дамуға қосқан үлесі
Биотехнология кафедрасында «Биотехнология» ББ 4-курс студенттерінің ұйымдастыруымен Тұрақты даму мақсаттарына (ТДМ 4,11) қол жеткізу бағдарламасы аясында «Сәкен Сейфуллин: әдеби мұра және оның тұрақты дамуға қосқан үлесі» тақырыбында пікірталас алаңы өткізілді.
Іс-шара мақсаты – студенттерді Сәкен Сейфуллиннің өмірбаяны және оның шығармашылығымен таныстыру, қазақ әдебиеті мен мәдениетін дамытуға қосқан үлесін талқылау, сонымен қатар ақын-жазушының шығармашылығын сапалы білім беру (ТДМ 4) және мәдени мұра (ТДМ 11) контексінде байланыстыру.
Іс-шара барысында бірқатар студенттер (Ж.Мұтай, А.Қабылбек, А.Мұстафа, А.Әділхан, А.Баймұхан) Сәкен Сейфуллиннің өмірі мен шығармашылығы, ақын-жазушы ретіндегі рөлі және қоғам қайраткері туралы қызықты презентация мен баяндамалар жасады. Сондай-ақ оның өмірінің негізгі кезеңдерінің ішінде ұлттық қозғалыс пен әдеби мұраға қосқан үлесі жан-жақты талданды. Р.Қалыбек әдеби мұраның мәдени бірегейлілігін қалыптастырудағы маңыздылығын аша отырып, «Сейфуллиннің шығармашылығы – бұл тек қағаздағы сөз емес, бұл біздің халқымыздың жаны» деп атап өтті.
Шараның келесі бөлімінде студенттер «Тар жол, тайғақ кешу», «Асау тұлпар» сынды түйінді шығармаларын белсенді талқылап, олардың заман рухын қалай бейнелейтіні және заманауи контексте қаншалықты өзекті екені туралы өз ойларымен бөлісті. А.Талипова әдебиет пен ТДМ байланысын айқындай отырып, «Сәкен Сейфуллин шығармалары мұрамызды бағалай білуге және оны кейінгі ұрпаққа жеткізуге, сөйтіп, ұрпақтар сабақтастығын жетілдіруге баулиды», – деп тұжырымдады. Ш.Тастан Сәкен Сейфуллин шығармашылығының сапалы білім беру (ТДМ 4) және мәдени мұраны сақтау (ТДМ 11) бағыттары бойынша қол жеткізуге қалай ықпал ететінін талдап, жастардың мәдени болмысын қалыптастыру және тәрбиелеу үшін әдеби мұраның маңыздылығын шеберлікпен көрсете білді.
Шараның соңғы бөлімінде студенттер мәдени мұраның және қоғамның тұрақты дамуы үшін қазақ әдебиеті мен мәдениетін зерттеу маңызын мойындай отырып, алдағы уақытта осындай іс-шаралардың жиі ұйымдастырылуына қызығушылық танытатыны туралы өз ойымен бөлісті әрі жалғастыруға ниет білдірді.
Салтанат АСРАНДИНА,
Биотехнология кафедрасының профессоры
Басқа жаңалықтар
