Әл-Фараби атындағы Қазақ ұлттық университетінде мүмкіндігі шектеулі жандарға арналған ақпараттық семинар

2025 жылдың 14 ақпанында Әл-Фараби атындағы Қазақ ұлттық университетінің "Инклюзивті орта" ғылыми-тəжірибе орталығы мен "Жаркент" корпоративтік қорының ұйымдастыруымен "Оқу құқығы" тақырыбында ақпараттық семинар өтті. Семинарға Қазақстан, Тәжікстан және Қырғызстан елдерінен келген сарапшылар, мемлекеттік орган өкілдері, инклюзия саласының мамандары мен мүгедектігі бар жандар қатысты.
Семинарды "Қазақ соқырлар қоғамы" Орталық Басқармасының төрағасы Алмат Сабитжанұлы Наурызбаев кіріспе сөзбен ашты. Ол ақпаратқа қолжетімділікті қамтамасыз етудің маңыздылығын атап өтіп, инклюзивті қоғам қалыптастыру жолындағы негізгі мәселелерге тоқталды. Одан кейін сөз алған тұрақты әлеуметтік даму жөніндегі проректор Сәбит Құрманжанұлы Суатай және ҚР Парламенті Мәжілісінің депутаты Кенжеғұл Социалұлы Сейітжан да инклюзивті білім мен ақпараттық қолжетімділікті арттыруға қатысты өз пікірлерін білдірді.
Семинар барысында бірнеше маңызды баяндамалар жасалды. ҚР Парламенті Сенаты жанындағы Инклюзия жөніндегі кеңестің төрайымы, ҚР Әділет министрінің штаттан тыс кеңесшісі Ляззат Молдабекқызы Калтаева инклюзивті қоғам құрудағы өзекті мәселелерді көтерді. ҚР Парламенті Мәжілісінің депутаты Таңсауле Ғабдыманапұлы Серіков Марракеш шартының маңыздылығы туралы баяндама жасады.
Тәжікстаннан келген "Мехрбахш" мүгедектігі бар адамдар қауымдастығының төрағасы Холмахмад Ахмадович Тенгниев Тәжікстанда Марракеш шартын қолдау және мүгедектігі бар жандардың ақпаратқа қолжетімділігін қамтамасыз ету бойынша тәжірибесімен бөлісті. Қырғызстаннан келген Нуриля Нурсеитовна Сарыбаева инклюзивті кітапханаларды дамытуға арналған ABC консорциумы жобасы туралы айтты.
Семинардың маңызды бөлігі Әл-Фараби атындағы ҚазҰУ-дің "Инклюзивті орта" ғылыми-тəжірибе орталығының директоры Гайни Оразбековна Тажинаның баяндамасы болды. Ол университете инклюзивті ортаны дамыту бойынша жүргізіліп жатқан жұмыстар туралы айтып өтті.
Технологиялық даму және ақпараттық қолжетімділік мәселелеріне де ерекше назар аударылды. Қазақ зағиптар қоғамының өкілі Марлен Джакупов көру қабілеті бұзылған жандар үшін ақпараттық технологияларды пайдалану тәжірибесімен бөлісті. Назарбаев университетінің ассистивтік технологиялар және қолжетімділік жөніндегі сарапшысы Зият Абдықаимов 2025 жылға дейінгі міндеттер мен даму перспективаларын талқылады.
Семинар соңында Алматы қаласы әкімінің мүгедектер мәселелері жөніндегі кеңесшісі Қасиет Омарова жеке тәжірибесімен бөлісіп, ақпаратқа қолжетімділік саласындағы өзекті мәселелерді қозғады. Қатысушылар пікір алмасып, болашақта атқарылатын жұмыстар мен ынтымақтастық мүмкіндіктерін талқылады.
Семинар мүмкіндігі шектеулі жандардың ақпаратқа қолжетімділігін арттырудағы маңызды қадамдардың бірі болды. Қатысушылар инклюзивті қоғам қалыптастыру үшін түрлі елдердің тәжірибесімен танысып, бірлескен бастамаларға негіз қалады.

Қатысушылар: Түркітану және тіл теориясы кафедрасы меңгерушісінің оқу-әдістемелік және тәрбие істері бойынша орынбасары Ш.Т. Кудьярова, аға оқытушысы А.Ж. Рақымбаев және кафедра ППС.