Алматы ақшамы

ЗАМАНА КӨШІНДЕ – ЖАҢА ЗАҢДАР

Әл-Фараби атындағы ҚазҰУ-дің заң факультеті – классикалық құқықтық білім берудің ең үздік дәстүрі негізінде осы заманғы инно­вациялық әдістемелерді қолданып жүрген жоғарғы оқу орны. Факуль­теттің даму стратегиясына сай, педагогикалық үдерісте қазіргі заңтану ғылымы саласындағы ықпалдастықтың қажеттілігі мен кафедраның ғылыми әлеуетін арттыру мақсатында тиісті жағдай жасалуда. Сондай-ақ, дарынды және жоғары білікті мамандарды ғылыми-педагогикалық қызметке тарту, кадрлық қорды қамтамасыз ету, оқу үдерісіндегі тәжірибелік қызметке маман тарту жолға қойылуда. Заңгер дайындауда халық­аралық институттармен, орталықтармен ынтымақтастық орнаты­лып, зерттеу және ғылыми жобаға қатысатын профессор-оқытушылық құрамның жай-күйі қарастырылуда.
Заң факультетінің студенттері елі­міздің заң шығарушы органдарында шығып жатқан заңдармен қаруланып, заңдық-құқықтық нормативтермен жіті танысуда. Биыл Қазақстан Республи­касының «Телерадиохабарларды тарату туралы» Заңы, «Қоғамдық кеңестер ту­ралы» Заңы, «Ақпараттық қолжетім­ділік туралы» Заңы, «Сайлау туралы» Заңы мен «Мемлекеттік қызмет туралы» Заңы қа­былданды. Осы заң жобалары ұсынылған шақта студенттеріміз оны жан-жақты тал­дауға қатысып, осыған қатысты ұсыныс­тарын, ой-пікірлерін ортаға салған бола­тын. Кейін сараланып, дараланған соң Парламенттің қос палатасының сүзгісі­нен өткен еліміздің бұл заңдары заңдық күшіне еніп, өмірлік қолданысқа көшті.
Ел өміріне аса қажет маңызды осы заңдық құжаттармен танысу барысында университет студенттері заң алдында өз­дерін сергек сезінді, адам құқығы мен бостандығын құрметтеуге ынталанып, айнала орта мен табиғатты, Отаны мен отбасын сүюге ықыласы артты. Мәселен, бұдан бұрынғы «Мемлекеттік қызмет туралы» Заңда 30 бап болса, жаңа заңда 72 бап бар. Жаңа заңның жаңалығы да мол. Онда меритократия қағидаты берік орнығып, әскери қызметке кеткен маман­дардың да жағдайы оңтайлы қарас­ты­рылған. Дала заңынан демократия заңына дейінгі бел-белеске көз жүгірткен кемел келешектің фемида өкілдері тәр­биенің тал-бесіктен, тәртіптен бастау алатынын ұқты. Отаншылдық сезім, аза­маттық пен еңбек­қорлықтың өзі осын­дайдан басталады.
Әл-Фараби атындағы ҚазҰУ-дің қыл­мыстық құқық, қылмыстық іс жүргізу және криминалистика кафедрасы тәжіри­белі мамандармен түрлі кездесу ұйым­дас­тырып, «Құқық қорғау органдарының не­гізгі міндеттері», «Қазақстанда қылмыс­ты­лықтың алдын алу шаралары», «Про­ку­ратура органдарының негізгі бағыттары» тақырыбында ашық дәріс сабағын өткізіп тұрады. Тәуелсіз демократиялық, құқық­тық мемлекет құру жолында еліміздің барлық заңгерлері мен қоғамдық бірлес­тіктердің негізгі міндеті – сыбайлас жем­қорлық пен қылмысқа қарсы күресті қамта­масыз ету.
Елбасы Н.Назарбаев қылмысқа қарсы күресте бірінші кезекте табанды көзқарас ұстануды тапсырды. Елба­сының биылғы Жолдауында осындай өзекті мәселе өткір қойылған. Қыл­мыстың ауыздықталуы нәтижесінде экономикалық өсімнің қам­тамасыз етілуі бірқалыпты деңгейге жетті. Заң жүйесі, заң-құқықтық тәртіп, оның орындалуы мен қадағалануына сот, про­куратура, ішкі істер және ұлттық қауіп­сіз­дік органдарында қызмет ететін жоғары білікті факультет түлектері тікелей ат­салысуда. Түлектер қай салада да табан­дылық танытып, жүктелген міндетті жауап­кершілікпен атқаруда.
Айжан АРЫН, әл-Фараби атындағы ҚазҰУ-дің заң факультеті қылмыстық құқық, қылмыстық іс жүргізу және криминалистика кафедрасының оқытушысы, заң ғылымдарының магистрі.