ҚазҰУ мен Алматы қаласының әкімдігі «Ғылым, бизнес және өндіріс интеграциясы» форумын өткізді

Әл-Фараби атындағы Қазақ ұлттық университетінде Алматы қаласының әкімдігімен бірлесіп ұйымдастырылған «Ғылым, бизнес және өндіріс ықпалдастығы» атты форум өтті.

Іс-шараға Алматы қаласының әкімі Ерболат Досаев, ҚазҰУ-дың Басқарма Төрағасы – Ректор Жансейіт Түймебаев, экология және қоршаған ортаны қорғау, сейсмикалық қауіпсіздік саласындағы өкілдер мен сарапшылар, сондай-ақ өндіріске инновациялық технологияларды енгізуші компаниялар, ғылыми қауымдастық және 200 ге жуық бизнес өкілдері қатысты.

Форумның пленарлық сессиясында Алматы қаласының әкімі Ерболат Досаев баяндама жасап, қалалық инфрақұрылымды, экологияны және цифрландыруды дамытудың өзекті міндеттеріне тоқталды. Қала әкімі ғылым мен инновацияны ілгерілету Мемлекет басшысының саясатының басты басымдықтарының бірі екенін атап өтті. «Мемлекет басшысының идеяларын жүзеге асыруда еліміздің ғылыми және білім беру орталығы ретінде Алматыға ерекше мән беріледі. Қалада Қазақстанның барлық жоғары оқу орындарының үштен бірі орналасқан, 280 мыңнан астам студент оқиды және 130-дан астам ғылыми-зерттеу орталықтары жұмыс істейді, бұл Қазақстандағы ғылыми ұйымдардың жалпы санының үштен бірін құрайды», – деді Ерболат Досаев.

Өз сөзінде Әл-Фараби атындағы ҚазҰУ-дың Басқарма Төрағасы – Ректор Жансейіт Түймебаев университеттің жетістіктері мен алдағы жоспарлары туралы баяндап, бүгінгі форум ғылым, бизнес және өндіріс ынтымақтастығына арналып отырғанын жеткізді.

«Ұлттық құрылтайда Мемлекет басшысы Қазақстанда  ғылым қалашығын құру туралы мәселені көтерді. Президент Үкіметке осы бастаманы жан-жақты зерделеп, тиісті заң жобасын дайындауды тапсырды. Мамандандырылған ғылыми-технологиялық аймақтар ғылыми ұйымдарды, кәсіпорындарды және инновациялық стартаптарды біріктіреді. ҚазҰУ Алматының инновациялық экожүйесіне кіруге және ғылыми әзірлемелерді коммерцияландыруда зор мүмкіндіктерге ие. Бұл бізге ғылыми қалашық болуға мүмкіндік береді. Алдағы уақытта қазақстандық жоғары оқу орындары арасында ең ірі технопарк, инновациялық парк және жасанды интеллект орталығының құрылысы жоспарлануда», – деді ректор Ж.Түймебаев.

Форумда қатысушыларға ҚазҰУ-дың «Farabi Hub» инновациялық өнімдер және жоғары технологиялық жобалар орталығы таныстырылды. Хабта Жерді қашықтықтан зондтау технологиялары жөніндегі Қазақстан-Қытай зертханасы, Солтүстік-батыс политехникалық университетінің филиалы, «Робототехника және мехатроника RoboMech» орталығы, Технопарк зертханасы, Дәрілік өсімдіктер орталығы, ZTE компаниясының инновациялық орталығы, Химия және химиялық технологиялар зертханасы, «Сот сараптамасы» зертханасы орналасқан. Сондай-ақ қонақтарға химия және химиялық технология, биология және биотехнология, физика және нанотехнология саласындағы инновациялардың көрме стендтері көрсетіліп, университет базасындағы суперкомпьютер кластері, ҚазҰУ құрылысының II кезеңінің бас жоспары және ЖОО қызметі туралы бейнефильм ұсынылды.

География және табиғатты пайдалану факультетінің деканы Әлия Ақтымбаева Жерді қашықтықтан зондтау технологиялары жөніндегі Қазақстан-Қытай зертханасы Шыңжаң Экология және география институтымен бірлесіп құрылғанын атап өтті.

Орталықтағы ғалымдардың зерттеулері экологиялық мониторингке, табиғи ресурстарды басқаруға және климаттың өзгеруіне бейімделуге бағытталған. «Орталық Азия аумағында құрғақшылық, жердің деградациясы және су тапшылығы сынды ауқымды өзгерістер орын алуда. Аталған мәселелерді шешу үшін зертхана мамандары дрондардың көмегімен спутниктік деректерді жинақтап, далалық зерттеулер жұмысын жүргізеді. Орталық зерттеушілері табиғи ресурстарды тиімді пайдаланудың инновациялық шешімін де қарастырып, «Құрғақ климатты аймақтардағы ауыл шаруашылығының тұрақты дамуы» ұсынысын əзірлеп отыр» деп атап өтті Ә.Ақтымбаева.

Инжиниринг және жоғары технологиялар класстерінің бас директоры Әмірхан Темірбаев университет базасында Қытайдың Солтүстік-Батыс политехникалық университетінің филиалы табысты жұмыс істейтінін баяндады. Аталған жоғары оқу орнымен жүзеге асыралатын ортақ жобалардың бірі – микроспутник әзірлеу.

«ҚазҰУ ғарышқа наноспутниктерді ұшыру бойынша тәжірибесі бар еліміздің жалғыз жоғары оқу орны. Қазіргі таңда оқу ордасының зерттеушілері «NKSAT» микроспутнигін әзірлеу жұмыстарын жүргізуде.  Бұл Қазақстан мен Орталық Азиядағы алғашқы университеттік микроспутник болмақ. Ғарышқа ұшырылатын микроспутник жердің гравитациялық өрісін және радиациялық сәулені өлшеу, геологиялық барлау жүргізу бойынша негізгі үш міндетті орындайды» деді Ә.Темірбаев.

Әл-Фараби атындағы ҚазҰУ-дың химия және химиялық технология факультетінің деканы Алина Галеева химия және химиялық технология зертханасын таныстырды.

«Farabi Chem Science» кластеріне 8 озық зертхана мен химиялық гальваникалық қаптамалар шығаратын ғылыми-өндірістік орталығы кіреді. «Факультет ғалымдары химиялық ток көздері бойынша, атап айтқанда натрий және магний-ионды аккумуляторларға арналған жаңа материалдар, батареяларды қайта өңдеу және оларды жинау үшін фандоматтарды дамыту жұмыстарын жүргізеді.

Сонымен қатар Chemical Coating innovations ғылыми-өндірістік орталығы машина жасау және техникалық құрал жасау қажеттіліктері үшін, сондай-ақ кәдесыйлар мен зергерлік бұйымдарын өңдеп, арнайы гальваникалық қаптамалар шығарумен айналысады.

Фармацевтика саласы бойынша Қазақстандық өсімдік шикізатына негізделген 8 препарат, жаралар мен күйіктерді емдеуге арналған гидрогельді жабындар, қуық онкологиясын емдеуге арналған импланттар әзірленуде. Факультет зерттеушілері ота кезінде пайдаланылатын хирургиялық жіпті жетілдіріп, бетіне антибактериалды жабын жасап шығарды. Аталған ғылыми жоба адам өмірін сақтап қалуға мүмкіндік береді. Оқу ордасының ғалымдары әзірлеп шыққан химиялық жіп аналогтарға қарағанда 3 есе арзан» деді А.Галеева.

Форум соңынан ҚазҰУ мен «Astana Motors Manufacturing» және «Dragon Lakshme Group KZ» ЖШС компаниялары арасында ынтымақтастық туралы келісімге қол қою рәсімі өтті. Тараптар автокөлік өнеркәсібінде кадрларды даярлау және инновациялар саласында өзара ынтымақтастық орнатып, сондай-ақ сумен жабдықтау және экология бойынша бірлескен жобаларды әзірлейді.

Форумның пленарлық сессиясында «Астана Моторс Мanufacturing Kazakhstan» зауытының директоры Максим Тарасов, ҚР ҰҒА академигі Амангелді Бисенбаев, Қазақстандағы ZTE корпорациясының бас директоры Вэй Вэй, ҚР ҰҒА академигі, ҚазҰУ профессоры Мұхамбетқали Бүркітбаев, ҚР ҰҒА бас директоры «Alageum Engineering» ҰТО Әділбек Тәжібаев, биология ғылымының докторы, профессор, Дәрілік өсімдіктер орталығының директоры Жанар Жеңіс және т.б. жетекші ғалымдар мен бизнес-сарапшылар пікір бөлісіп, тәжірибе алмасты. 

Форум барысында ғалымдар, кәсіпкерлер, әкімдік өкілдері және басқа да қатысушылар арасында ашық пікірталас өтті. Панельдік сессияда қатысушылар қалалық ортаның, өнеркәсіптің және тұрақты дамудың өзекті сын-қатерлерін шешу үшін болашақта бірлесіп атқаратын жобаларды талқылады.

Әл-Фараби атындағы ҚазҰУ-дың Баспасөз қызметі