ҚазҰУ-дың Химия және химиялық технология зертханасы кристалдарды өсіру технологияларын әзірледі

Әл-Фараби атындағы Қазақ ұлттық университеті Алматы қаласының әкімдігімен бірлесіп ұйымдастырған «Ғылым, бизнес және өндіріс ықпалдастығы» атты форумда ғылым және бизнес өкілдеріне Химия және химиялық технология зертханасы таныстырылды. Келушілер назарына «Farabi Chem Science» кластері мен «Chemical Coatings Innovations» ғылыми-өндірістік орталығының өнімдері мен зерттеу жұмыстары ұсынылды.  

 Құрамына тоғыз ғылыми зертхана  кіретін «Farabi Chem Science» кластерінің мақсаты – экология, энергия көздері, дәрілік химия, мұнай химиясы және энергияны көп қажет ететін материалтану салаларында зерттеулер жүргізу және жаңа шешімдер әзірлеу. Ғылыми зертханалар қоршаған ортаны ластаушы заттарды анықтауға және талдауға, химиялық қуат көздері үшін жаңа материалдарды әзірлеуге, мұнай химиясы саласында терең зерттеулер жүргізуге, отандық биомедициналық препараттар мен бактерияға қарсы қорғаныс жабындарын өндірудің оңтайлы әдістерін дайындауға мүмкіндік береді. Сонымен қатар металл және ағаш конструкциялары үшін отқа төзімді жабындарды жасау, ерекше қасиеттері бар бейорганикалық материалдардың жаңа түрлерін зерттеу, заттар мен материалдарды сандық және сапалық талдау бойынша қызметтерді орындауға бағытталған.

Мұнда ғалымдардың еркін жұмыс істеуіне қолайлы жағдай жасалып, зертханалар соңғы үлгідегі құрал-жабдықтармен жабдықталған. Қазақстан Республикасы Ғылым және жоғары білім министрлігінің гранттық және бағдарламалық-нысаналы қаржыландыру жобаларын және демеушілік субсидияларды іске асыру шеңберінде сатып алынған жаңа техниканың құны 1 млрд теңгені құрайды.

Бұл зертханалар оптика және электроника сияқты алдыңғы қатарлы салаларда сұранысқа ие литий трибораты (LBO) негізіндегі қымбат жасанды кристалдарды өсіру технологияларын әзірледі. Натрий-иондық және магний-иондық аккумуляторлар үшін жаңа материалдар әзірленді,  дәстүрлі литий-иондық батареяларды алмастыра алады. Немістің Lanxess фирмасымен, ресейлік «Сибур» және польшалық «Synthos» фирмаларымен бірлесіп нитрил бутадиен каучугін гидрлеу үшін жаңа катализаторлар жасалды.

Жақында ғана ашылған университеттің гальваникалық цехында халықаралық стандарттар бойынша шығарылатын әртүрлі мақсаттағы коррозияға қарсы, сәндік, тозуға төзімді, ыстыққа төзімді және басқа жабындар жасау үшін электрохимиялық технологиялар кешені әзірленді. Сондай-ақ табиғи тастан беріктігі жағынан жоғары және құрылыс пен өнеркәсіпте кеңінен қолданылатын полимерлі композиттерді алудың технологияларын сәтті әзірлеп, өнеркәсіпке енгізді. Ал медицина саласында профессорлық-оқытушылық құрам Қазақстаннан алынған синтетикалық және өсімдік шикізаты негізіндегі оншақты дәрі-дәрмектің, соның ішінде жаралар мен күйіктерді тиімді емдеуге арналған полимерлі гидрогельдер негізіндегі инновациялық маскалар мен таңғыштарды жасағанын мақтан тұтады.

Әл-Фараби атындағы ҚазҰУ-дың баспасөз қызметі