ҚазҰУ өкілдері Ташкентте өткен UASR Туризм Субальянсының отырысына және OBOROT халықаралық конференциясына қатысты

2025 жылдың 24–26 маусым күндері әл-Фараби атындағы ҚазҰУ-дың География және табиғатты пайдалану факультетінің делегациясы туризм және тұрақты даму саласындағы халықаралық академиялық ынтымақтастықты нығайтуға бағытталған бірқатар маңызды іс-шараларға қатысты.

UASR Туризм Субальянсының отырысы

24 маусым күні Ташкент қаласындағы Орталық Азия университетінде Жібек жолы университеттер альянсының (UASR) Туризм субальянсының отырысы өтті. Жиын барысында Жібек жолы бойындағы елдердің университеттері арасындағы білім, ғылым және туризм мен қонақжайлылық индустриясындағы цифрлық инновациялар салаларында әріптестікті тереңдету мәселелері талқыланды.

Әл-Фараби атындағы Қазақ ұлттық университетінің атынан келесі оқытушылар баяндама жасады:

• Гульбарам Кулахметова, PhD, рекреациялық география және туризм кафедрасының аға оқытушысы – Гонконг политехникалық университетімен (PolyU) бірлесе құрылған және ҚазҰУ базасында жұмыс істейтін Орталық Азиядағы тұрақты даму орталығының қызметі туралы баяндама жасады.
• Елдар Нұрұлы, PhD ізденуші, рекреациялық география және туризм кафедрасының аға оқытушысы – туризм білімін цифрландыру, интернационалдандыру және инновациялық шешімдерді енгізу бойынша бастамалар ұсынды.

Жиынға сондай-ақ Гонконг, Қытай, Таиланд және Өзбекстан университеттерінің өкілдері қатысты. Келесі жылы өтетін IV OBOROT халықаралық конференциясына дайындық та күн тәртібінде болды.

OBOROT 2025 халықаралық конференциясы

25–26 маусым күндері Орталық Азия университетінде өткен III OBOROT халықаралық конференциясы туризм саласындағы 20-дан астам елден келген 300-ден аса жетекші ғалымдарды, оқытушыларды және сарапшыларды жинады. Бұл конференция туризм саласындағы заманауи сын-тегеуріндер мен трансформацияларды талқылауға арналған маңызды платформаға айналды.

ҚазҰУ оқытушылары мен студенттері бірқатар ғылыми баяндамалар жасап, халықаралық аудиторияның зор қызығушылығына ие болды және университеттің цифрлық әрі тұрақты туризм саласындағы үлесін айқындады:

1. Blockchain негізіндегі шешімдер арқылы қонақ үй индустриясындағы клиент деректерінің қауіпсіздігін арттыру
   Авторлары: Елдар Нұрұлы, Айсулу Сембаева, Алия Актымбаева
2. Алматы қаласындағы смарт-туризмге дайындықты бағалау: AHP әдісін қолдану арқылы көпөлшемді тәсіл
   Авторлары: Әмина Шырынтай, Елдар Нұрұлы
3. Нейрондық желілер мен дәстүрлі модельдер туризмде: нәтижелілік, кедергілер және этикалық аспектілер
   Авторлары: Аружан Серікбол, Елдар Нұрұлы, Жаннат Алиева

ҚазҰУ баяндамалары халықаралық деңгейде жоғары бағаланып, рекреациялық география және туризм кафедрасының ғылыми әлеуетінің жоғары деңгейін көрсетті. Бұл бағыт кафедраның цифрлық шешімдерге, инновацияға және халықаралық серіктестікке басымдық беретінін дәлелдеді.

Іс-шара барысында АҚШ, Өзбекстан, Қытай, Таиланд және Гонконг университеттерімен жаңа байланыстар орнатылып, бірлескен жобалар, тағылымдамалар және академиялық алмасулар бойынша үлкен мүмкіндіктер ашылды.

Халықаралық форумдарға қатысу факультеттің ғылыми-зерттеу орталығы ретіндегі имиджін нығайтып қана қоймай, туризм және тұрақты даму саласындағы халықаралық академиялық әріптестікті кеңейтуге жол ашты.