Сапа күні: кафедра студенттерімен кездесу

Сапа күніне орай әл-Фараби атындағы ҚазҰУ-дың жылуфизика және техникалық физика кафедрасында «Стандарттау және сертификаттау (салалар бойынша)» білім беру бағдарламасының студенттерімен кездесу өтті. Кездесуді кафедраның аға оқытушысы Зульбухарова Эльмира Мұқанқызы жүргізді.

Іс-шара барысында сапа мәдениетінің маңызы, оның заманауи ғылым мен техникада, өндірісте, өнім қауіпсіздігін қамтамасыз етудегі рөлі жан-жақты қарастырылды. Сапа қағидаттары процестердің тиімділігін арттыруға, кәсіпорындардың бәсекеге қабілеттілігін күшейтуге және тұрақты дамуға тікелей әсер етеді. Осыған байланысты сапа стандарттары инновацияларды енгізудің, энергия тиімділігін арттырудың және экологиялық шешімдерді дамытудың маңызды құралы болып табылады. Бұл бағыттар ТДМ 9 «Индустрияландыру, инновациялар және инфрақұрылым» және ТДМ 12 «Жауапты тұтыну мен өндіру» мақсаттарымен тығыз байланысты.

Кездесуде студенттердің осы мамандықты таңдау себептері де талқыланды. Бағдарлама техникалық пәндер, сапаны басқару, нормативтік-құқықтық негіздер және сәйкестікті бағалаудың цифрлық тәсілдерінен тұратын кешенді дайындықты ұсынады. Мұндай дайындық түлектердің сертификаттау органдарында, сынақ зертханаларында, өндірістік кәсіпорындарда, энергетика, машина жасау, тамақ және фармацевтика салаларында сұранысқа ие болуына мүмкіндік береді.