ҚазҰУ үздіктерді анықтады: «Физхимик 2026» халықаралық олимпиадасының іріктеу кезеңінің қорытындысы

Әл-Фараби атындағы Қазақ ұлттық университетінің Химия және химиялық технология факультетінде еліміздің академиялық жарыстар күнтізбесіндегі маңызды оқиғаға айналған физикалық химиядан жыл сайынғы халықаралық олимпиаданың іріктеу кезеңі өтті.

Биылғы «Физхимик 2026» олимпиадасы көрнекті академик Х.Қ. Оспановтың есімімен аталады және айтулы дата — белгілі ғалым, профессор Гүлжан Хасенқызы Шәбікованың 90 жылдық мерейтойына арналған. Ұрпақтар сабақтастығы мен ілгерідегі ғалымдардың еңбегіне құрмет көрсету шараның басты ұстанымына айналды.

Зияткерлік сайысқа келесі негізгі бағыттар бойынша білім алатын 2–4 курс студенттері қатысты:

• Химия;
• Органикалық заттардың химиялық технологиясы;
• Химиялық инженерия.

Конкурстық тапсырмалар қатысушылардан іргелі салалар бойынша терең білімді талап етті. Сұрақтар химиялық термодинамика мен кинетиканың ең күрделі бөлімдерін қамтып, студенттердің теориялық дайындығын ғана емес, қолданбалы есептерді шығару дағдыларын да сынады.

Іс-шара физикалық химия, катализ және мұнай химиясы кафедрасының жетекші доценті Алма Сапарқызы Түсіпбекованың жетекшілігімен жоғары әдістемелік деңгейде өтті. Турды ұйымдастыру мен өткізуге кафедраның тәжірибелі оқытушылары: Р.Н. Әжіғұлова, С.М. Наренова, А.Қ. Жүсіпова, Б.С. Бәкірова және Ж.Б. Бекісанова белсенді атсалысты.

Кафедра меңгерушісі, профессор Е.Ә. Әубәкіров қатысушыларға құттықтау сөз сөйлеп, сәттілік тіледі. Ол мұндай жарыстардың Қазақстанның болашақ ғылыми элитасын қалыптастырудағы маңыздылығын атап өтіп, студенттерді мақсатқа жетуде табандылық танытуға шақырды.

Шиеленісті күрес пен жұмыстарды мұқият тексеру нәтижесінде үздік деп танылғандар:

1.      Аманбаева Жансая

2.      Әсілбекова Гүлім

3.      Бөлекбаев Ерсұлтан

4.      Ілияс Әмірәлі

5.      Қалаубай Санат

6.      Ібіраева Сабина

7.      Симонов Михаил

Дәл осы студенттерге әл-Фараби атындағы Қазақ ұлттық университетінің намысын олимпиаданың халықаралық кезеңінде қорғау мәртебесі бұйырды. Факультет ұжымы жеңімпаздарды құттықтайды және халықаралық аренада қара шаңырақ мерейін үстем етулеріне тілектестік білдіреді!

Физикалық химия, катализ және мұнай химиясы кафедрасының доценті А.К. Жүсіпова