ҚазҰУ-де Цинхуа университеті және CNNC делегациясымен ТДМ 4 пен ТДМ 17 аясындағы ғылыми ынтымақтастық талқыланды

Әл-Фараби атындағы Қазақ ұлттық университеті базасында Қытайдың жетекші жоғары оқу орындарының бірі — Цинхуа университеті және China National Nuclear Corporation (CNNC) делегациясымен маңызды кездесу өтті. Кездесудің негізгі мақсаты Қазақстан мен Қытай арасындағы ғылым, білім және жоғары технологиялар саласындағы ынтымақтастықты одан әрі дамыту мәселелерін талқылау болды.

Кездесу барысында ҚазҰУ Басқарма Төрағасының орынбасары – бірінші проректор Еркін Дүйсенов Қазақстан мен Қытай арасындағы стратегиялық серіктестік жаңа кезеңге өткенін атап өтті. Оның айтуынша, қазіргі таңда ғылым мен білім саласындағы өзара іс-қимыл екі ел арасындағы байланысты нығайтып қана қоймай, тұрақты әрі бейбіт болашақты қалыптастырудың маңызды құралына айналып отыр.

Ол сондай-ақ Әл-Фараби атындағы ҚазҰУ бүгінде ғылыми дипломатияның жетекші алаңдарының бірі екенін атап өтті. Университет Қазақстан, Қытай және Орталық Азия елдерінің ғалымдарын, инженерлерін және студенттерін біріктіріп, халықаралық ғылыми байланыстарды дамытуға үлкен үлес қосуда.

Кездесу барысында қатысушылар бірлескен ғылыми зерттеулер жүргізу, студенттер мен оқытушылардың академиялық ұтқырлығын дамыту, халықаралық білім беру бағдарламаларын жүзеге асыру және жоғары технологиялар саласындағы инновациялық жобаларды қолдау мәселелерін талқылады. Әсіресе ядролық физика, энергетика және заманауи технологиялар бағытындағы ғылыми жобаларды дамыту мүмкіндіктеріне назар аударылды.

Бұл ынтымақтастық Тұрақты даму мақсаттарының жүзеге асуына да тікелей байланысты. Атап айтқанда, бастамалар ТДМ 4 – «Сапалы білім» мақсатына сәйкес келеді. Себебі халықаралық әріптестік арқылы білім беру сапасын арттыруға, ғылыми тәжірибе алмасуға және әлемдік деңгейдегі мамандар даярлауға мүмкіндік жасалады. Бірлескен ғылыми жобалар студенттер мен жас ғалымдардың заманауи зерттеулерге қатысуына жол ашады.

Сонымен қатар бұл кездесу ТДМ 17 – «Тұрақты даму мақсаттары үшін серіктестік» бағытының маңыздылығын көрсетеді. Қазақстан мен Қытай арасындағы ғылыми байланыстарды дамыту халықаралық ынтымақтастықты күшейтіп, жаңа инновациялық жобаларды жүзеге асыруға ықпал етеді. Мұндай серіктестік ғылыми әлеуетті тиімді пайдалануға мүмкіндік береді.

Кездесу соңында тараптар алдағы уақытта ынтымақтастықты кеңейтуге, жаңа ғылыми жобаларды жүзеге асыруға және ұзақ мерзімді білім беру бағдарламаларын дамытуға мүдделі екенін білдірді. Бұл бастамалар халықаралық ғылыми байланыстарды нығайтып, білім мен ғылымның дамуына жаңа серпін береді.

Бүгінде Әл-Фараби атындағы ҚазҰУ халықаралық әріптестікті дамыту арқылы аймақтағы жетекші ғылыми-білім беру орталықтарының бірі ретінде өз позициясын нығайтып келеді. Мұндай кездесулер университеттің ғылыми әлеуетін арттыруға және халықаралық деңгейде жаңа мүмкіндіктер ашуға ықпал етеді.