«Әлімжеттіктің түрлері және алдын алу жолдары»

2026 жылдың 03 наурызында әл-Фараби атындағы Қазақ ұлттық университетінің Филология факультетінің Шетел филологиясы және аударма ісі кафедрасының аға оқытушысы Оңғарбаева М.С. және 1-курс докторанты Дауылова Д.Ж. «Шетел филологиясы (батыс тілдері)» мамандығының 3-курс студенттеріне арналған «Әлімжеттіктің түрлері және алдын алу жолдары» тақырыбында тәрбие сағатын өткізді.

Іс-шараның негізгі мақсаты – студенттердің әлімжеттік (буллинг) туралы түсінігін кеңейту, оның түрлерін ажырата білуге үйрету және алдын алу жолдары туралы ақпарат беру, сондай-ақ жастар арасында өзара құрмет пен толеранттылық мәдениетін қалыптастыру.

Талқылау барысында әлімжеттіктің келесі түрлері қарастырылды:

— физикалық әлімжеттік;

— психологиялық (эмоционалдық) қысым көрсету;

— вербалды қорлау;

— әлеуметтік оқшаулау;

— кибербуллинг.

Студенттер қазіргі қоғамдағы әлімжетіктің себептері мен салдарын талдап, оның жеке тұлғаның психологиялық жағдайына, академиялық үлгеріміне және әлеуметтік бейімделуіне тигізетін кері әсерін атап өтті.

Іс-шара барысында тақырыптық презентациялар көрсетіліп, бейнематериалдар талқыланды. Студенттер ситуациялық тапсырмалар орындап, әлімжеттік жағдайында өзін қалай ұстау керектігі туралы өз ұсыныстарын білдірді.

Қорытынды бөлімде әлімжеттіктің алдын алу жолдары ретінде:

— сенімді қарым-қатынас орнату;

— құқықтық сауаттылықты арттыру;

— психологиялық қолдау көрсету;

— университет ішінде сенім жәшіктері мен кеңес беру орталықтарының жұмысын күшейту;

— өзара құрмет пен жауапкершілік қағидаттарын насихаттау ұсынылды.

Іс-шара нәтижесінде студенттер әлімжеттікке қарсы тұру – әрбір саналы азаматтың міндеті екенін және қауіпсіз, қолайлы білім беру ортасын қалыптастыруда жастардың рөлі ерекше екенін атап өтті.

Шетел филологиясы және аударма ісі кафедрасының

аға оқытушысы Оңғарбаева М.С.,

1-курс докторанты Дауылова Д.Ж.