Құрылыс материалдарын өндіру саласындағы бизнесті ұйымдастыру және дамыту

2026 жылғы 18 наурызда Экономика кафедрасы «Talases Tarlanes Stroy KZ» ЖШС негізін қалаушы Махтал Сапарғалиқызымен мастер-класс өткізді. Спикер құрылыс саласындағы 16 жылдан астам басқарушылық тәжірибесіне сүйене отырып, бизнестің жұмыс істеуінің практикалық аспектілерін, атап айтқанда өндірістік процестерді ұйымдастыру, персоналды басқару және құрылыс материалдары нарығын дамыту мәселелерін қарастырды. Оның жетекшілігіндегі компания Қазақстан нарығында табысты жұмыс істеп, 200-ден астам маманды жұмыспен қамтып отыр, сондай-ақ құрылыс өнімдерінің кең ауқымын өндіруші және жеткізуші болып табылады.

Іс-шараға «6В04103-Экономика» білім беру бағдарламасының 3 курс студенттері қатысты. Кездесу интерактивті форматта өтіп, практикалық кейстерді талдаумен қатар студенттердің белсенді қатысуына ықпал етті. Мастер-класс қорытындысы бойынша өндірістік тәжірибені ұйымдастыру, студенттерге менторлық қолдау көрсету және түлектерді компанияның кадрлық резерві ретінде қарастыру бағыттарында ынтымақтастықты дамыту туралы келісімге қол жеткізілді.

Осындай іс-шараларды өткізу Тұрақты даму мақсаттарын жүзеге асыруға ықпал етеді: ТДМ 4 (сапалы білім), ТДМ 8 (лайықты жұмыс және экономикалық өсу) және ТДМ 17 (тұрақты даму мүддесіндегі әріптестік), сондай-ақ университет пен бизнес арасындағы байланысты нығайтады.

Экономика кафедрасы