Рухани-адамгершілік тәрбие аясында студенттермен Ғабит Мүсірепов атындағы Қазақ Мемлекеттік Академиялық балалар мен жасөспірімдер театры

2026 жылғы 2 сәуірде Ақпараттық жүйелер кафедрасының оқу-әдістемелік және тәрбие ісі жөніндегі орынбасары, аға оқытушы Ілесова Бақытгүл Ералықызының жетекшілігімен 1–4 курс студенттері Ғабит Мүсірепов атындағы Қазақ мемлекеттік академиялық балалар мен жасөспірімдер театрында қойылған «Қорғансыз» спектаклінің премьерасына қатысты.

Аталған мәдени іс-шара студенттердің рухани дамуына, эстетикалық талғамының қалыптасуына және ұлттық әдебиет пен театр өнеріне деген қызығушылығының артуына бағытталды. Театр – тұлғаның жан-жақты дамуына ықпал ететін маңызды мәдени орта ретінде студент жастар үшін ерекше маңызға ие.

Спектакльдің негізгі мазмұны қоғамдағы қорғансыздық, әділетсіздік және адам тағдырының нәзік қырларын ашуға негізделген. Қойылым барысында көрермендер қазақ қызының тағдыры арқылы өмірдің ащы шындығын терең сезінді. Әсіресе Ғазиза бейнесі арқылы әйелдің қоғамдағы орны, оның ішкі жан дүниесіндегі қайшылықтары мен күйзелістері шынайы әрі әсерлі түрде жеткізілді. Ғазизаның өмір жолы көрермендерді толғандырып қана қоймай, әлеуметтік мәселелерге бейжай қарамауға шақырды.

Сахнадағы әрбір көрініс актерлердің кәсіби шеберлігімен, режиссерлік шешімдердің үйлесімділігімен және жарық пен дыбыстың әсерлі қолданылуымен ерекшеленді. Қойылым көрермендерді оқиға желісіне толықтай еліктіріп, олардың эмоциялық қабылдауына күшті әсер етті. Әсіресе басты кейіпкердің жан күйзелісі мен үмітсіздікке толы сәттері залдағы әрбір көрерменнің жүрегіне жетті.

Студенттер спектакльден кейін өзара пікір алмасып, алған әсерлерімен бөлісті. Көпшілігі қойылымның шынайылығы мен кейіпкерлер тағдырының ауырлығына ерекше назар аударды. Ғазизаның тағдыры студенттердің жүрегіне әсер етіп, жанашырлық сезімін оятып, өмірге деген көзқарасын тереңдетті. Қойылым барысында залдағы тыныштық пен көрермендердің назар аударуы олардың оқиғаға толық берілгендігін көрсетті.

Осындай мәдени іс-шаралар студенттердің дүниетанымын кеңейтіп, олардың адамгершілік құндылықтарын нығайтуға және ұлттық мәдениетке деген құрметін арттыруға ықпал етеді. Театр – тек өнер ордасы ғана емес, ол – тәрбиенің, ойланудың және рухани дамудың маңызды құралы.

Аталған іс-шара студенттердің бос уақытын тиімді ұйымдастырумен қатар, олардың мәдени деңгейін арттыруға бағытталған маңызды бастамалардың бірі болды. Алдағы уақытта да осындай тағылымды кездесулер жалғасын табады деп күтілуде.

🎭 «Қорғансыз» спектаклінен әсерлі сәттер