Әл-Фараби атындағы Қазақ ұлттық университеті мен БҰҰ Өркениеттер альянсі (UNAOC) ынтымақтастық туралы меморандумға қол қойды. Тараптар ЮНЕСКО қолдауымен 2020 жылды әл-Фараби жылы қылу идеясын және ұлы философтың 1150 жылдық мерейтойына орай халықаралық деңгейде іс-шаралар өткізу бастамасын көтерді.
Бұл ақпарат жайлы БҰҰ Өркениеттер альянсінің жоғары өкілі Насир Абдулазиз әл-Насер ҚазҰУ-ға сапары барысында баяндады. Оқу орнының ректоры Ғалым Мұтанов Шығыстың ұлы ойшылы әл-Фарабидің ізгілікті қоғам туралы идеясының негізінде қаланған «Ізгілікті қоғам азаматтарын қалыптастыру» жобасы ынтымақтастық туралы меморандум аясында жүзеге асырылатынын атап өтті. Жобаның мақсаты – өскелең ұрпаққа бейбітшілік, жақсылық және әділеттік идеяларын жеткізу.
«Тәрбиесіз берілген білім – адамзаттың қас жауы, ол келешекте оның өміріне зиян әкеледі» деген әл-Фараби сөзі бүгінде аса өзекті» деп ой тарқатқан ректор: «Егер жоғары оқу орындарының түлектері кәсіби құзыреттілікпен қоса жоғары адамгершілік құндылықтарға ие болса, онда әлем жақсырақ әрі қауіпсіз, әл-Фараби айтқандай, ізгі болады», – деп сенім білдірді. Қол қою рәсімінде Насир Абдулазиз әл-Насер: «UNAOC сіздердің университеттеріңіз тәрізді оқу орындарының мәдениеттер диалогында өмірлік маңызды рөл атқаратынын мойындайды, біз бұл күрделі әрі бүкіл әлемге қажетті жұмысты жоғары бағалаймыз» деп атап өтті. Өз сөзінде ол «Ұлы ойшыл және үздік философ Әбу Насыр әл-Фарабидің құрметіне аталған жалғыз оқу орны болып саналатын университет «Академиялық ықпал» бағдарламасын жүзеге асыруда БҰҰ-ның сенімді серіктесі және әлемдік академиялық бірлестікті өз қызметіне белсенді түрде тартуда» деді. Насир Абдулазиз әл-Насер университет оқытушылары және студенттерімен, шетелдік дипломатиялық корпус, ғылыми қоғам өкілдерімен өткен кездесуінде жаһандық БҰҰ Өркениеттер альянсінің белсенді мүшесі ретінде Қазақстанның рөлі ерекше екенін атап өтті.
– Қазақстан әлемдегі тұрақты дамуға қол жеткізу үшін зор үлес қосуда, сіздердің Көшбасшыларыңыз Нұрсұлтан Назарбаев жас ұрпаққа үлкен қолдау көрсетуде, – деді UNAOC-тің жоғары өкілі. – Қазақстан жастарының білім алуы және ғылыммен айналысуына барлық мүмкіндіктер жасалған. Біз олардың Альянс жобаларына қатысу ниеттерін қолдайтын боламыз. Насир Абдулазиз әл-Насер Қазақстанның әлемдік қоғамдастықтың қолдауына ие болған ядролық қаруды таратпау және аймақтық қауіпсіздікті сақтау жөніндегі бейбіт бастамаларын және Сириядағы жағдайды реттеуге қосқан мемлекеттің үлесін айрықша атап өтті.
Мәртебелі мейман университет қалашығымен және мұндағы әл-Фараби мұражайымен танысып, «Керемет» студенттерге қызмет көрсету орталығында жастармен пікір алмасты. ҚазҰУ жасыл технологиялар орталығын аралаған БҰҰ Өркениеттер альянсінің басшысына ғалымдар мен студенттердің Астанада Бүкіләлемдік көрмеде қойылатын энергия үнемдеу саласындағы жобалары көрсетілді. Әлемдік деңгейдегі айтулы оқиғаның құрметіне ол «ЭКСПО – 2017» университеттік аллеясына ағаш отырғызды.
Басқа жаңалықтар
