«Qazaq universiteti» — ҚазҰУ шежіресі

«Qazaq universiteti» газеті редакциясымен 2011 жылы таныстым. Ол кезде ҚазҰУ-дың журналистика факуль­те­тіне оқуға түсуге талпынып жүргенмін. 11-сыныптың оқушысымын әрі осы ЖОО өткізген байқаудың жүл­де­гері атандым. Сол жайлы шыққан газетті алу үшін редакцияға барған едім. Ректораттың 11-қабатындағы басылым қызметкерлері Саягүл Әлімбекова мен Еңлік Ақжігіт сондай бір жылы шыраймен қарсы алды. Сұраған газеттерімді жылдам тауып берді. Мерзімді баспасөздегі журналистика, жалпы, журналистикаға деген әдемі әңгіме өрбіді. Содан бастап бұл редакция менің университеттегі ең сүйікті орталығыма айналды. Әрі ең бірінші жұмыс орным болды.

2013 жылы басылымның бас редакторы Саягүл Әлімбекова редакцияға 0,5 штаттық бірлікпен беттеуші-дизайнер қызметіне жұ­мыс­қа шақырды. Ол кезде уни­вер­ситеттің «Баспа ісі» ма­ман­ды­ғының 3-курс студенті едім. Оған дейін университет газетіне жиі мақала беріп тұратынмын. Бірақ газет беттеу деген, – мақала жазу емес. Бұл – бір жағы, мен оқып жатқан мамандыққа тікелей жақын жұмыс. Сабақта ұста­зы­мыз Сағатбек Медеубекұлының жетек­шілігімен «Баспагер» оқу-тәжірибелік газетін, кафедраның аға оқытушысы болған Бәтіш Ома­рова, Роза Әбдиева ұстаз­да­ры­мызбен «Шуақ» оқу-тәжіри­бе­лік жастар журналын, Ұлттық жур­налистік зерттеу орталығының президенті, аға оқытушы Дәрмен Смайыл ұстазымызбен «Күн сәті» кітабының толық баспа-поли­гра­фиялық жұмыстарын жасап, тәжірибе жинақтағанбыз. Сон­дық­тан болар, бұл қызметтің аса қиын болмайтыны түсінікті еді. Бірақ бұл оқу-тәжірибелік газет емес, сондықтан жауапкершілік жүгі салмақты. Оның үстіне бірін­ші жұмыс күнім – газеттің 65 жыл­дық мерейтойына сәйкес кел­ді. Бұл тіпті жұмыстың сал­мағын еселей түсті. Редактормен бірге газетті түн ортасына дейін беттедік. Газет таңертең уақтылы баспадан басылып шықты. Ол кезде жауапты хатшы Дариға Амангелдиева апамыз баспада күн-түн демей отырып, шығарып, ректоратқа алып келетін. Кейде апаймен ілесіп біз де барып, газеттің шығу барысымен та­ны­сып, баспахана маши­наларының қа­сында жүретінбіз. Бұл бір қы­зық дәурен еді.

Сол жылдары департамент ди­ректоры Дәурен Дүйсебаев, ба­сылым редакторы Саягүл Әлімбекова «Qazaq universiteti» газетінде жастар бетін көбейту, студент жастардың ой-пікірлерін, әңгімелерін, өлең-жырларын, сту­дент­тік өмірлерін бейнелейтін фо­т­осуреттердің болуына көп көңіл бөлді. Осының негізінде «Жез­қоңырау» айдарын ашып, оны тұрақты түрде жүргізіп отырдым. Газетте Бейбіт Мекеев, Әйгерім Әлімбековалар да бас редакторлық қызметті атқарды. 2018-2021 жылдар аралығында университеттік «Qazaq universiteti» газеті бас редакторының мін­де­тін атқарушы, бас редакторы қызметтерін атқардым. Бұл осы басылымдағы ең үлкен жауап­кер­шілік міндет жүктелген жыл­дар болды.

2018 жылы басшылық газет­ке басылымның бас редакторлық міндетін атқарушы қызметін жүк­теді. Редакцияда кадр аз болды, ортақ Баспасөз қызметіне бірік­кен бөлім болғандықтан, негізгі ақ­параттарды осы бөлім қыз­мет­керлерінен алатынбыз. Өзім 0,5 штат­тық бірлікте жұмыс істедім. Бөлім басшысы Гүл Баяндина га­зеттің біраз жұмысына көмек­тес­ті, бірлесіп шығардық. Мен жұ­мыс­ты толық алып кеткенше Гүл Құттыбекқызы газеттің орыс тілін­дегі материалдарына ұқып­ты­лықпен қарады. Баспасөз қыз­метінен Жанна Сағади, Анвар Ушуров, Айнұр Ақынбаева, Еңлік Ақжігіт, Қайыржан Төрежан, Свет­лана Өмірғалиевалар газет жұмысына жанашырлық танытты.

Осы жылдары алғаш рет га­зетте латын әріптерімен жазуды қолдану үрдісі жүріп жатқан еді. Газеттің ішкі айдарларын, қысқа-нұсқа, жүгіртпе жол ақпараттары латын әріптерімен басылды. Сондай-ақ газетімізден тәжіри­бе­ден өтуге мүмкіндіктер қарас­ты­рыл­ды.

2019 жылы университетіміз 85 жылдық мерейтойын атап өтті. Жыл бойы басылымда универ­си­тет тарихынан бастап, ғалымда­ры­мыздың, студенттеріміздің пікір­­лерін, ойларын, ұсыныс­та­рын жа­рия­лап отырдық. Ме­рей­тоймен алыс-жақын шетелдерден құт­тық­таулар да толастамады. ҚазҰУ тү­лектері де қара ша­ңы­раққа тарту жасап жатты. Мұның бар­лығы біз­дің газеттің бетінде жарияланды.

2020 жылы газет әл-Фа­ра­бидің 1150 жылдық мерейтойын барынша насихаттады. Газеттің қаңтардағы №1 нөмірінен бас­тап, жыл соңына дейін ұлы ғұ­ла­маның ғылымдағы орны ға­лым­дар тарапынан терең зерттеліп, сараптамалық-танымдық мақа­ла­лармен үздіксіз жарияланып отырды. Әл-Фараби мерейтойын осылайша университетіміз БҰҰ-мен бірлесіп әлемдік деңгейде атап өтті. Мерейтой жылының ашылуы мен ғылыми жиындарда, конференцияларда, мемлекеттік шараларда, мерейтой жылының жабылуында газеттің арнайы нө­мірлері жарық көріп, ол барлық қатысушыларға таратылды. Бұл өз кезегінде «Qazaq universiteti» газетінің халықаралық аренада медиа ұтқырлығын көрсете алған тамаша уақыты болғаны сөзсіз.

Бір жағынан, 2020 жылы ко­ро­навирус пандемиясы жа­рия­ланғандықтан, газет алғаш рет он­лайн форматта оқырманға ұсы­нылды. 2021 жылы сәуір айының соңында газеттегі бас редак­торлық жұмысымның соңғы күнін аяқтадым.

 «Qazaq universiteti» газеті мен үшін үлкен тәжірибе мектебі бол­ды. Осында жүріп дизайнер-бет­теуші, журналист, бас редактор қызметтерінен өттім. Бұл осы са­ладағы үлкен мүмкіндік деп біле­мін.

Осы естелік мақаланы жаз­ған­да «Qazaq universiteti» газе­тіндегі жылдарым көз алдымнан сырғып өтті. Қалай ғана ұмытуға болады, ол жылдарды!?. Төл ме­рекеңмен, сүйікті газетім!

Досжан БАЛАБЕКҰЛЫ,

философия докторы (PhD)