Университеттің көзі, құлағы hәм тілі

Қазақ білімінің қара шаңырағы – ҚазҰУ-дың «Qazaq universiteti» газетіне 1998-2000 жылдар аралығында бас ре­дактор болдым. Сөйтіп, бұдан бұрын шетелдердегі қан­­дас бауырларымызға арнап шығарылған халық­ара­лық «Біздің Отан», кейіннен белгілі себептермен атын «Шалқар» деп өзгерткен басылымда тілші болғандағы және ұлт ұстазы Ахмет Байтұрсынұлы басшылық еткен «Қазақ» газетін жалғастырып, қайта шыққан «Қазақтың» бас редакторының орынбасары қызметін атқарғанда жиған мол тәжірибем кәдеге жарағаны бар. Оның үстіне 1998 жылы «Қазақ» газетіндегі ұлттық саяси-әлеуметтік мәселелердің жазылуы» деген тақырыпта кандидаттық диссертациямды сәтті қорғағанымды ескерген болу керек, университеттің сол кездегі басшылығы осы қызметті сеніп тапсырды. 

Сенім үдесінен шығу – өмір­лік №1 ұстанымым. «Qazaq universiteti» газеті тізгінін қолыма алғаннан кейін тағы да сол талап төрінен көрінуге бар күш-жігер, қайратымды сарқа пайдаланғаным есім­де.

Атақты «Қазақ» газетінің табыс кілті халықшылдығында екенін зерттеушісі ретінде терең түсіндім. Сондықтан «Qazaq universiteti» газетінің тізгінін ұстаған күннен оның таралымын арттыруға күш салдым. Газеттің тиражын өсіру үшін оны қызықты етіп, оқылымын арттыру керектігін ұқтым. Ол үшін біржақты жағымды жаңалықтарды ғана жариялайтын газет мазмұ­ны­на өзгеріс енгізу керек болды. Біртіндеп сыни материалдар да жариялай бастадық. Фа­куль­теттерге рейдтер ұйым­дастырып, студенттерге сөз мінберін беруге тырыстық. Газеттің ашық пікір алмасу ала­ңына айналуы өз жемісін бере бастады. Басылымның тиражы аз уақыттың ішінде 500 данадан 3000-ға дейін өсуі соны аңғартты.

«Қазақ университетіне» әкел­ген тағы бір жаңалығым – осыған дейін университет баспасының құрамында құ­ры­лымдық бірлігі болып кел­ген газет редакциясын ар­найы бөлім етіп, жеке қар­­­жыландыру мүмкіндігіне қол жеткіздік. Нарық тілімен айтқанда, дербес қаржы­лан­дыру тетігін таптық. Әр фа­куль­тет декандарымен жеке-жеке келісім жасап, олардың есебінен газеттің ішкі есеп­шо­тына қаржы аударуларын қамтамасыз еттік. Сөйтіп, ал­ғаш рет газеттің өзін-өзі қаржыландыруына жағдай жасадық. Соның арқасында тұрақты авторларымыз бен студенттерге ынталандыру үшін қаламақы төлеп, қуант­қан кездеріміз де болды. Түр­лі корпоративтік шаралар ұйымдастыруға мүмкіндік арт­ты. Мұндай жағдай көп бі­лім ордаларының басылым­да­рында күні бүгінге дейін болмағанын ескерсек, оның өзін үлкен жетістік деп санаймын.

«Qazaq universiteti» – та­ри­хы терең, дәстүрі бай ба­сы­лым. Газет ұжымына өткеннен сабақ алып, дәстүрлі жолды жанды жалғастыруға жазсын деген тілек қосамын. Қара шаңырақ ҚазҰУ-ымның көзі, құлағы һәм тілі – «Qazaq universiteti» жасай берсін!

 Қайрат САҚ,

Л.Н.Гумилев атындағы ЕҰУ журналистика және саясаттану факультетінің деканы, алаштанушы-ғалым