Хинди тілінде еркін сөйлейді

Хинди тілі күні ая­сында Үндістанның Қазақстан­дағы Төтенше және Өкілетті елшісі Нагендра Прасад мырза шығыстану факуль­те­тінде қонақта болды.

Шығыстану факультетінің Таяу Шығыс және Оңтүстік Азия кафедрасы үндітану бө­лімі Тұ­рақ­ты даму мақсаттары ая­сын­да «Хинди дивас» – хинди тілі кү­ніне арналған мә­де­ни шара өт­кізді. Бұл күн хин­ди тілін Үн­дістанның ұлттық тілі ретінде та­рату мақсатында рес­ми түр­де аталып өтеді. Ше­шім 1949 жы­лы 14 қыр­күйекте қа­был­да­нып, кейін Үндіс­тан­ның Конс­ти­туция­сы­мен бекі­тіл­ді.

Әл-Фараби атындағы ҚазҰУ-да Хинди Дивас ме­ре­кесі 1998 жылы алғаш хинди тілі бөлімі ашылғаннан бастап 25 жыл қатарынан ұйымдастырылып келеді. Мәдени шараға мәр­те­белі қонақтар – Үндістанның Қазақстандағы Төтенше және Өкілетті Елшісі Нагендра Пра­сад, Свами Вивекананда атын­дағы үнді мәдени орталығының директоры Санджай Веди, Үндістан Консулының ассис­тен­ті Н.Бора, Дж.Неру атын­да­ғы университеттің Халықаралық қатынастар факультетінің де­каны, профессор Шрикант Кон­дапалли, Үнді мәдени Кеңесінің өкілі Бхаскар Бикрам Четия, қазақ-үнді классикалық би орталығының директоры Ақ­ма­рал Қайназарова қатысты.

Үндістанның мемлекеттік ән­ұра­ны флейтаның сүйе­мелдеуі­мен орындалғанына қонақтар тәнті болды. Кеш барысында үнді әндері орындалып, хинди тілінде өлең-жырлар оқылды. Үндітанушы-студенттер хинди тілінің тарихы туралы бейне­баян даярлап, белсенділік та­нытты. Үндістан мен Қазақ­стан арасында сая­си-эконо­ми­ка­лық, дипломатиялық қатынас­тар­дың серпінді дамуына бай­­ланысты үнді аймағын зерт­теушілерді даярлау маңыз­ды екені айтылды. Хинди тілінде еркін сөйлеп, Үндістанға қа­тысты терең білімдерін көр­сет­кен болашақ үндітанушы сту­дент­терге қонақтар риза бол­ды. Шараны жоғары дең­гейде ұйымдастырғаны үшін үндітану бөлімінің мең­ге­рушісі Сымбат Исмагулова және бас­қа да үндітану бө­лі­мінің оқы­ту­шылары мен білім­герлеріне Үндістан Елшісі атынан алғыс хат, сыйлықтар тарту етілді.

Кеш соңында қонақтарға үн­ді шайы мен тағам түрлері ұсы­нылып, еркін сұхбаттасу жал­ғасты.

Бота СЕРІКҚАНҚЫЗЫ,

Таяу Шығыс және Оңтүстік Азия кафедрасының

доцент м.а. PhD

Шығыстану факультеті