Чан Бенг СУН:Студенттер Корей елі тарихымен танысуға мүмкіндік алды
Әл-Фараби атындағы Қазақ ұлттық университеті Корея халқының шетелдік серіктестерімен кең ауқымды байланыстар орнатуда. Негізгі ынтымақтастық бағыттар – ғылым, білім, мәдениет бойынша жүзеге асырылмақ. Осы орайда, Корея Республикасынан келген, шығыстану факультеті Қиыр Шығыс кафедрасының доценті Чан Бенг Сунды әңгімеге тарттық.
Чан Бенг Сун – Ханяңг университетінің мәдени антропология бакалавры, Донгук университетінің менеджмент магистрі. Әл-Фараби атындағы Қазақ ұлттық университеті философия және саясаттану факультеті саяси ғылымдар кандидаты. Мансап жолындағы тәжірибесі өте мол. Мәселен, Сеул қаласындағы Азия мәселелері институтының директоры, Мәскеу қаласындағы «IT.com» компаниясының бас директоры, Корея Республикасында «Tongnamunara.com» компаниясының бас директоры атанған. Әл-Фараби атындағы Қазақ ұлттық университеті Корейтану кафедрасында аға оқытушы болды. Ұзақ жылдар бойына Орталық Азиядағы «Бір Азия» клубының директоры мансабын абыроймен атқарды. Жапониядағы Еуразия қорының қолдауымен жүзеге асқан «Еуразия» халықаралық ғылыми жобасының директоры т.б. қызметтерін атқарған. 2007 жылдан қазіргі уақытқа дейін Әл-Фараби атындағы ҚазҰУ Қиыр Шығыс кафедрасының доценті.
– Қазақстанға алғаш рет 1993 жылы келгенмін. Әл-Фараби атындағы Қазақ ұлттық университетінің философия және саясаттану факультетіне аспирантураға түсіп, 2011 жылы саяси ғылымдар кандидаты атандым.
2007 жылы университетіміздің шығыстану факультетінің Қиыр Шығыс (корейтану) кафедрасында студенттерге сабақ бере бастадым. 2007 жылы осы университетте қызметке кіріскеннен бері барлығы жиырма университетпен, соның ішінде Сеул ұлттық университеті, Йонсэ университеті, Коре университеті, Ханьян университеті, Донггук университеті, Кукмин университеті, Сунгшил университеті, Хонгик университеті, Соганг университеті және Конкук университеттерімен ҚазҰУ арасында байланыс орнатуға үлес қосып, септігімізді тигізуге тырыстық. Меморандумға қол қою арқылы корей бөлімі студенттері Корея университеттерінде тіл жетілдіріп, сол елдің мәдениеті мен тарихымен танысуға көп мүмкіндіктер алды, – деді Чан Бенг Сун.
Доценттің айтуынша, 2013 жылдан осы уақытқа дейін барлығы 300-ге жуық ҚазҰУ магистранттары мен докторанттары Кореяның Донггук және Ханьян университетіне оқуға және жазғы мектепке жіберілген.
– Сонымен қатар корейтану бөлімінің 70-ке жуық студенті Кореяның Ұлттық стипендиялық бағдарламасы бойынша (KGSP) магистратура және докторантурасына ұсынылып, қабылданды. Ал 2012 жылы Жапонияның «Еуразия» қорының қолдауымен халықаралық «Еуразия» жобасы ҚазҰУ университетінде өз жалғасын тауып, он жыл бойы жоба директоры ретінде қызмет атқардым. Бұл жоба аясында Кореядан және дүниежүзінен 30-ға жуық профессор, Қазақстаннан 100-ден астам профессор дәріс оқуға шақырылды, – дей келе, ұстаз жарияланымдары мен еңбектерін атап өтті.
«COVID-19 дағдарысы кезіндегі қазақстандық жоғары оқу орындарындағы ұйымдастырушылық мәдениет және әлеуметтік ахуал» тақырыбында Қазақ ұлттық университетінде зерттеу жүргізген. Аталмыш зерттеу Америка Құрама Штаттарының Философиялық құжаттама орталығында жарияланған. Одан бөлек, «Империалистік корей мәдени объектілері жинағының әсері», «Этникалық бірегейлікті қалпына келтірудің мәдени саясаты», «Өзін-өзі танудағы инновациялар» т.б. индекстелген халықаралық журналдарда мақалалары жарияланған. «ХХ ғасырдың аяғы мен ХХІ ғасырдың басындағы Қытайдың Орталық Азиядағы стратегиясы», «Корей-орыс аудармасы: маңызды мәдени мұра» т.б. кітаптары жарық көрген.
Халықаралық «Еуразия» жобасы аясында Әл-Фараби атындағы Қазақ ұлттық университеті атынан көптеген білім ордаларында дәрістер оқыды: Мадридтің Комплютенс университетінің гуманитарлық факультеті, Испания; Бургос университеті, Испания; Донггук университеті, Сеул; Хило университеті, Гавайи, АҚШ; Сеулдегі Ихва әйелдер университеті; Ұлттық ғылым және технология университеті, Сеул; Пучон университеті, Ташкент т.б. және Қазақстанның бірнеше жоғары оқу орындарында студенттермен жүздесіп, тәжірибе алмасқан.
Нұрбек НҰРЖАНҰЛЫ
Басқа жаңалықтар
