Айнымас дос,сенімді сырлас

Бәрі күні кешегідей көз алдымда. Ол күнді, «Qazaq universiteti» газетінің сол күнгі нөмірін қалайша ұмытайын?! Ұлттық универ­ситет­тің көзі, құлағы һәм тіліне айналған басылымның 2014 жыл­дың 6 мамырындағы №17 (1527). Осы нөмірдің 6-бетінде жария­лан­ған Әлеуметтану және әлеуметтік жұмыс кафедрасының оқы­тушысы С.М.Болысбаеваның «Махаббат, қызық мол жылдар...» деп аталатын шағын мақаласында менің де аты-жөнім аталыпты.

Бұл Қызылорданың облыс орталығынан шал­ғайда жатқан Жан­кент дейтін ауылдың ша­ғыл құмын кешіп өс­кен қарадомалақ бала үшін ғана емес, оның ата-анасы үшін де өте үлкен жетістік еді. Екін­ші жағынан, «Qazaq uni­versiteti» газе­тін­де есімің аталды де­ген сөз – «маң­дай­алды сту­дент болдың» де­генді меңзейтін. Ол кез­де университеттік газетке шығу абырой ғана емес, үлкен дә­ре­же де болатын. Ендеше ауылдан арман арқа­лап, ару қала Алматыға келген, еліміздегі ғана емес, әлемдегі жетек­ші әрі көшбасшы оқу орнына мемлекеттік грант бойынша қабыл­дан­ған 1-курс студенті үшін бұдан артық қан­дай жетістік керек?!

Аталған тақы­рыпта­ғы: «Жақында филосо­фия және саясаттану факультеті «Әлеу­мет­тік жұ­мыс» бөлімінің 1-курс студенттері «100 кітап» жобасы ая­сын­да Әзілхан Нұрша­йық­овтың «Махаббат, қызық мол жылдар» кі­табын талқылады. Ма­хаббат тақырыбы жас­тарды, әсіресе сту­дент жастарды бейжай қалдырмайтыны анық. Сондықтан аталған ро­манды топ сту­денттері ерекше ықыласпен оқып, өз ойларын ор­та­да ашық жеткізе біл­ді. Нұршайық Әбдуәли: «Мені басты кейіпкер Ерболдың қазіргі кез­де көп жігіттердің бо­йын­да кездесе бер­мей­тін махаббаттағы адалдығы мен шы­на­йы­лығы сүйсіндірді. Осы кітапты оқи оты­рып, махаббаттың бар екенін, оның қандай түрде болу керек еке­нін ұғынған­даймын», – деп өз пікірін білдір­се...» деп басталатын ма­қаланы әлі күнге үтір-нүктесіне дейін жат­қа білемін.

Жасыратыны жоқ, кей­де алыста қалған сту­денттік шақта­рым­ды, университет қа­быр­ғасында өткен алаң­сыз күндерімді, ұс­таздарым мен дос­тарымды сағынған кез­де аталған басы­лым­ның нөмірін қайта па­рақтап, сүйікті га­зет­іммен сырлас­қан­дай күй кешемін.

Биыл қияға қанат қақтырған оқу орда­мызға 90 жыл болса, ал оның үніне айналған «Qazaq universitetі» га­зетіне 75 жылдан асты.

Бір қарасаңыз, 75 жыл деген жай ғана сан, цифр секілді. Бі­рақ кез келген ба­сы­лым үшін осы 75 жыл­дың қатпарында қан­ша­ма тарих, ше­жі­ре мен сыр, талай оқи­ғалардың ізі жатқа­нын біреу білсе, біреу білмейді. Осынау жыл­дар ішінде талай май­талмандар басшылық еткен газет киелі қара шаңырақпен бірге тү­леп, бірге жасап ке­леді. Бүгінде елімізге та­нымал көптеген жур­налистер мен ақын-жазушылар шы­ғар­ма­шылық жолын осы ба­сылымнан бас­та­ғаны да «Qazaq universiteti» газетінің са­ла­лық басылым бол­­­ға­нымен, үлкен тәр­­бие мектебі еке­ні­нің жарқын дәлелі.

Бұл күндері универ­ситеттің қайнаған өмі­рі мен қызыққа толы жылдарының жарқын жаршысына, оқу орда­сын­дағы әр мезеттің куәгері мен жылна­ма­сына айналған басы­лымның осы күнге оңайлықпен жетпе­ге­нін, талай қиын-қыстау күндерді бастан кешіп, соқтықпалы-соқ­пақ­сыз кезеңдерден өт­ке­нін көзіқарақты оқыр­ман жақсы білуге тиіс. Басында бюллетень си­патында жарық көр­ген газетті өз алдына жеке-дара отау қылып, үлкен штаты бар ұжым­ға айналдыруда бір­не­ше буын өкілінің маң­дай тері мен орасан зор еңбегі жатқаны айт­паса да түсінікті.

Бір кездері «Песня о тревожной молодости» деген өлең жария­ла­ғаны үшін қуғындалып, 1986 жылғы Желтоқсан оқи­ғасы кезінде «ұлт­шыл» деп айыпталып, редакция ұжымына тү­гел кінә тағылып, жа­бы­лудың сәл алдында қалған басылымның жүріп өткен жолдары – еліміздің тарихынан бөліп қарауға бол­май­тын ақтаңдақ кезең­дер екені ақиқат. Міне, бір ғана оқу орнының га­зеті болғанымен, «Qazaq universiteti» бас­қа басылымдардан биік тұратыны да сондықтан.

Студент кезімізден қалыптасқан әдет пе, әлде жастық шағы­мыз­дың алты жылын қабырғасында өткіз­ген­діктен бе, басқа қалада, басқа салада жүрсек те, әлі күнге дейін университет сай­тынан газеттің элек­трондық нұсқасын үзбей қарап, оқу ор­да­мыздың, ондағы ұс­таз­дарымыз бен жас­тардың жетістігін оқып, марқайып отырамыз. Себебі біз үшін Әл-Фа­раби атындағы Қазақ ұлттық университеті мен «Qazaq universiteti» газеті – егіз ұғым, айнымас дос, сенімді сырлас.

Олай болса, бүгін ашы­лып, ертең жабы­лып жатқан кейбір ба­сылымдарға қара­ған­да, ақпарат айдынында өзінің орны мен ай­та­ры, терең тарихы мен шежіресі бар, бір ғана университет шең­бе­рінен шығып, еліміздің қоғамдық-саяси өмірі­не белсенді үн қатып ке­ле жатқан басы­лым­ға деген құрметіміз күн сайын арта бермек.

Нұршайық ӘБДУӘЛИ,

университет түлегі,

Қызылорда облыстық қоғамдық даму басқармасы

Ақпараттық талдау орталығының

талдау және болжау бөлімінің басшысы