Болашақ түлектерге бағдар берілді

Тұрақты даму мақсаттары әлемдегі кедейлікті жоюға, теңсіздік пен әділетсіздікке қарсы тұруға, сондай-ақ қоршаған ортаны қорғауға және барлық адамдар үшін бейбітшілік пен гүлденуді қамтамасыз етуге бағытталған жаһандық деңгейде қабылданған мақсат түрлері екенін білесіздер. 2030 жылға дейін ТДМ-ның 17 негізгі бағыты таңдалды. Мұны іске асыру қоғамның негізгі салаларын тұрақты дамы­туға және бұл проблемалардың бар екенін әрбір адам ұғынуы тиіс.

Осы орайда, тұрақты да­мудың төртінші мақсаты ту­ралы айту өте маңызды. Са­палы білім туралы айт­қанда, инклюзивтілік, қол­же­тім­ділік, тең мүмкіндіктер бағытына тоқтамай өте ал­май­мыз. Білім алу мүм­кін­дік­терін ілгерілету өте ма­ңызды, өйткені біз үнемі өз­геріп отыратын әлемде өмір сүреміз.

2021 жылғы статистика бойынша әлемде 245 мил­лион бала мектепте білім ала алмаған. Ал 2023 жылғы статистика дүниежүзінде 67 миллион бала бастауыш мек­тепке бармағанын ай­тады. Ал орта кәсіптік, ЖОО білім деңгейіне қол жеткізе алмайтындар қаншама... Мы­салы, әлемде 125 мил­лион жастың жоғары білім алуға мүмкіндігі жоқ. Ойлап қарасақ, өмір бойы білім алу үшін әрбір адам мек­теп­ке дейінгі жастан бастап, негізгі орта білімге дейін, кем дегенде, негізгі білім алуы керек. Ал біз көптеген елдерде жүздеген бала­лар­дың мұндай білімге қол жет­кізе алмайтынын көріп отыр­мыз.

Қазіргі таңда біздің елде білім алуға көп мүмкіндік бар. Осы мүмкіндікті бірі пай­даланса, енді бірі пай­далана алмай жатады. Осы мақсатты негізге ала оты­рып, педагогикалық прак­ти­ка барысында Алматы облысының Қарасай ауданы Қаскелең қаласындағы Көп­салалы облыстық үз­діксіз білім беру колледжіне, «Kursant» жекеменшік мек­тебіне және Үшқоңыр ауы­лын­дағы Ә.Бұқарбайқызы атындағы қазақ орта мек­те­біне барып, болашақ түлек­терді жоғары оқу орнына тү­суге деген мүмкін­дік­термен таныстырып, оларға дұ­рыс бағыт-бағдар беріп, бірнеше іс-шара жүргізіп қайттық.

Қара шаңырағымыз ҚазҰУ-дың жасап отырған зор мүмкіндіктеріне алғы­сым шексіз. Оқу орнында білім алумен ғана шектеліп қоймай, жан-жақты тәрбие­ле­ніп, қоғамдық іс-шара­лар­ға қатысып, тұлға ретін­де қалыптасу мақсатында университет қабырғасында ұйымдастырылатын түрлі шараларға, инновациялық жобаларға атсалысуға мүм­кін­дігіміз бар.

Үлкен өмірге қадам бас­қалы жатқан жас түлектерге қара шаңырағымыз ҚазҰУ жайлы таныстыру жұмыс­та­ры жүргізілді. Жастар үздік оқытушы-ғалымдардан білім алып, кәсіби маман боламын десе әрі студенттік өмірінің қызықты, ұмы­тыл­мас күндерге толы бол­ға­нын қаласа, үлкен мүм­кін­діктерге қол жеткізгісі кел­се, ҚазҰУ осы талап­тар­дың бәріне сай жұмыс іс­тей­тінін айтып, бағыт-бағдар бердік.

Әсем ӘМРЕНОВА,

Плазма физикасы, нанотехнология және компьютерлік физика кафедрасының аға оқытушысы, ф.-м.ғ.к.

Жаңылсын МӘДИХАНОВА,

«Физика» БББ 1-курс магистранты