Алматы Ақшамы

10 млн.доллардың суперкомпьютері

Рая ЕСКЕНДІР

Білімнің қара шаңырағы — ҚазҰУ Қытай үкіметінің гранты бойынша 10 млн. доллардың суперкомпьютерін алатын болды. Елбасы Нұрсұлтан Назарбаев Қытай Халық Респуб­ликасына жасаған мемлекеттік сапары барысында осындай уағда­ластыққа қол жеткізіп қайтты. Соны­мен, керемет компьютердің ерек­шелігі неде? Ол – бір секунд ішінде жүз он триллион опера­ция­ны жүзе­ге асыра алады екен. Елі­міздің басты оқу ордасына беріліп отыр­ған мұндай керемет компью­терді Қытайдың «ІNSPUR» компа­ниясы ұсынып отырса, оның қара­жатын Қытай үкіметі бөліп отыр.

Биылғы жылдың мамыр айында Қазақстан Респуб­ликасының Президенті Нұрсұлтан Назарбаев Қытай төрағасы Си Цзиньпиннің Қазақстанға жасаған сапары барысында екі ел арасындағы ғылыми-техникалық ынтымақтастықты одан әрі дамыту мақсатында «Sіlіcon valley» моделі бойынша іТ-технологиялық паркін құруды ұсынған болатын. Мемлекет басшысының идеясын іске асыра отырып, ҚазҰУ жаңа Жібек жолы университеттері альянсының халық­аралық іТ-технопаркін құру жөнінде бастама көтерді. Ол ҚазҰУ базасында суперкомпьютер және бұлт арқылы зерттеу негізінде құрылды.

Елбасы Н. Назарбаевтың Қытайға мемлекеттік сапары барысында әл-Фараби атындағы ҚазҰУ мен «ІNSPUR» ком­паниясының жетекшілері ынтымақтастық туралы меморандумға қол қойды. Бұл құжатта жобаны іске асыру бойынша бірлескен іс-әрекеттің негізгі бағыттары белгіленді.

Атап өткен жөн, индустриалдық-ин­новациялық даму жөніндегі мемлекеттік бағдарлама бойынша ҚазҰУ ақпараттық коммуникациялық технологиялар сала­сын­дағы жоғары білікті мамандар дайын­дайтын орталық ретінде таңдалды. Бұл үшін ҚР Инвестициялар және даму жөніндегі министрлікпен бірлесіп, бірегей «Технолофт» инновациялық кластері құрылып жатыр. Аталған кластер инно­вациялық шеберханалары мен өзегі суперкомпьютер болып табылатын ІT — технопаркті қамтиды.

Қазақстан мен Қытайдың ақпарат­тық-коммуни­кациялық технологиялар саласындағы ынтымақтастықты тереңдете түсуі ғылым мен білім саласындағы мем­лекет­аралық қарым-қатынасты жаңа дең­гейге көтереді. Шанхай ынтымақ­тастығы ұйымына мүше елдердің ғылыми-техни­калық өзара ықпалдастығы шең­берінде бірлескен зерттеу жобаларын жүзеге асыру­дың мүмкіндігін кеңейтеді. Сонымен қатар бұл Қазақстан Прези­дентінің «Нұрлы жол – Болашаққа бастар жол» Жолдауымен үндесетін жаңа Жібек Жолы экономи­калық белдеуін құру жө­ніндегі мемлекетаралық ауқымды жобаны жүзеге асыруға өз ықпалын тигізеді.