Тува ғылыми журналымен ынтымақтастық

Әл-Фараби атындағы ҚазҰУ-да университет басшылығының философия ғылымының докторы, «Туваның жаңа зерттеулері» журналының бас редакторы, «Turkic Studies Journal» қазақстандық ғылыми журналының редакциялық алқасының мүшесі Ламажаа Чимиза Кудер-ооловнамен (Бельгия) кездесу өтіп, онда ғылыми журналдың бірлескен басылымының болашағы талқыланды. 

Кездесуде ҚазҰУ-дың Басқарма мүшесі – ғылыми-инновациялық қызмет жөніндегі проректор Жәмила Айтжанова қонақтарға ҚазҰУ қызметі мен жетістіктері туралы айтып берді.

Бүгінде ЖОО гуманитарлық және әлеуметтік ғылымдар саласындағы зерттеулермен белсенді айналысады. Университетте жарияланған ғылыми жұмыстар мәдениеттану, әлеуметтану және этнографияны қоса алғанда, көптеген тақырыптарды қамтиды, бұл оны бірлескен бастамалар үшін ұтымды серіктес етеді.

«Әл-Фараби атындағы ҚазҰУ-да 24 ғылыми журнал жарық көреді. Оның ішінде 21 журнал ҚР ҒЖБМ Ғылым және жоғары білім саласындағы сапаны қамтамасыз ету комитетінің ғылыми қызметтің негізгі нәтижелерін жариялау үшін ұсынатын басылымдар тізбесіне енгізілген. 2023 жылы ҚазҰУ-дың бірнеше ғылыми журналы Scopus халықаралық деректер базасына енгізілді. Атап айтқанда, «Physical Sciences and Technology», «ҚазҰУ Хабаршысы. Математика, механика, информатика сериясы» журналдары. Бұл саладағы жаңа жобалар өте өзекті. Бірлескен журнал ҚазҰУ басылымдарын әлемдік ғылыми қоғамдастыққа белсенді ілгерілетуге ынталандыру бола отырып, өз жемісін беретініне сенімдімін», – деп атап өтті проректор өз сөзінде.

«Туваның жаңа зерттеулері» журналының бас редакторы, «Turkic Studies Journal» қазақстандық ғылыми журналының редакциялық алқасының мүшесі Ламажаа Чимиза Кудер-ооловна екі тарап арасында басталған ынтымақтастықтың  кеңеюіне қуанышты екенін атап өтті. «Бүгінде үнемі бір ақпарат алаңында қалу мүмкін емес, әсіресе туысқан халықтар туралы мәселеге келгенде біздің елдер ғалымдарының жарияланымдарымен танысу қажет. Біз тәжірибе және ақпаратпен алмасып,  барлық жағынан бір-бірімізді қолдап, дамуымыз керек, сондықтан ортақ жобамыздың басталғанына қуаныштымын».

Айта кетерлігі, «Туваның жаңа зерттеулері» журналы туватану саласындағы кешенді зерттеулердің нәтижелерін жариялайды. Ол Scopus, Web of Science сияқты әртүрлі дәйексөз дерекқорларына енгізілген. Оның 2023 жылғы рейтингі «Өнер және гуманитарлық: тарих» саласында 96 процентиль (Q1), «Әлеуметтік ғылымдар: мәдени зерттеулер» – 89 процентиль (Q1), «Әлеуметтік ғылымдар: антропология» – 80 процентиль (Q1) құрады. Журнал мақалалардың сапасын жақсартып, ғылыми жарияланымдардың жоғары деңгейін сақтау үшін қос соқыр шолуды қолданады.

«Туваның жаңа зерттеулері» журналымен ынтымақтастық басылым форматында ресімделді, бұл халықаралық ғылыми мерзімді басылымдарда жалпы қабылданған тәжірибе болып табылады. Серіктестік аясында «Мәдениеттер диалогы» туватану айдары құрылады. Ол мәдени өзара іс-қимылдарды талдауға және Тува мен Қазақстан арасындағы тәжірибе алмасуға арналған, бұл әсіресе жаһандану мен мәдени әртүрлілік жағдайында өзекті.

Әл-Фараби атындағы ҚазҰУ-дың Баспасөз қызметі