Халықаралық ғылыми-практикалық конференция «Мәдени дипломатия: сөз, саясат және диалог»

2024 жылдың 18 қазанында Халықаралық қатынастар факультетінде Алматыдағы Италия мәдениет институты және Италия елшілігімен бірлесіп ұйымдастырылған «Мәдени дипломатия: сөз, саясат және диалог» халықаралық конференциясы өтті. Шараға ғалымдар, сарапшылар және шет мемлекеттердің дипломатиялық өкілдіктерінің өкілдері қатысты.

Конференцияның пленарлық мәжілісінде Әл-Фараби атындағы ҚазҰУ Басқарма мүшесі – Ғылыми-инновациялық қызмет жөніндегі проректор Жамила Нұрматқызы Айтжанова, Халықаралық қатынастар факультетінің деканы Жұлдыз Талгатқызы Сайрамбаева құттықтау сөз сөйледі. Негізгі спикерлердің бірі Италия Республикасының Қазақстан Республикасындағы Төтенше және Өкілетті Елшісі Марко Альберти мырза қазіргі әлемдегі мәдени дипломатияның маңыздылығы туралы баяндама жасады. Сөзінің соңында Елші мырза Италия мен Қазақстан арасындағы дипломатиялық қарым-қатынастардың отыз жылдығына орай, Шарын каньонында жас итальяндық пианистің қатысуымен, Қазақстан табиғатының сұлулығын оның музыкасы арқылы көрсету идеясымен түсірілген бейнероликті көрсетті.

Құрметті қонақтар мен спикерлер қатарында ҚР Сыртқы істер министрлігі Алматы қаласындағы Өкілдігінің Саяси ынтымақтастық басқармасының басшысы Аренова Алмаша Арыстановна және БҰҰ Жаһандық коммуникациялар департаментінің өкілі Властимил Самек, мәдениетаралық өзара іс-қимылды ілгерілетудегі дипломатияның рөлі туралы көзқарастарымен бөлісті. Сондай-ақ, Италияның Қазақстандағы Елшілігінің мәдени атташесі, Алматыдағы Италия мәдениет институтының директоры Эдоардо Кризафулли қызықты баяндама жасады.

Пленарлық отырыстан кейін конференция жұмысы секцияларда жалғасты. Модератор халықаралық қатынастар және әлемдік экономика кафедрасының меңгерушісі Байкушикова Гүльнара Серикбаевна болды. Спикерлердің баяндамалары жұмсақ күшке, жаһандық экономика контекстіндегі мәдени дипломатияға, тілдерді оқытудың ұлттық аспектілеріне және мәдени дипломатияның элементі ретіндегі музыкаға арналды. Мәдени дипломатияны ілгерілетудегі жеке тұлғалардың рөлінің маңыздылығын атап өткен «Di più» итальян тілі орталығының директоры Лючия Белтрамидің баянадамасын ерекше атап өтуге болады. Қатысушылар жаһандық өзара тәуелділік жағдайында мәдени дипломатияның маңыздылығын мойындап,  халықаралық кедергілерді еңсеру үшін мәдениетаралық диалогтың қажеттілігін атап өтті.

Конференция қорытындысы бойынша мәдени дипломатия мен халықаралық ынтымақтастықты дамыту үшін ұсыныстар әзірленді. Ұйымдастырушылар барлық қатысушыларға алғыс білдіріп, әсіресе Италия Мәдениет институты мен Қазақстандағы Италия Елшілігінің қолдауын ерекше атап өтті.