Республика күні: Қазақ хандығынан Қазақстан Республикасына дейінгі мемлекеттік құрылымның эволюциясы.

Әл - фараби атындағы Қазақ ұлттық университеті БҰҰ-ның Тұрақты Даму бағдарламасының төртінші бағытына жататын Сапалы білім беру бағдарламасы аясында Тарих факультетінің, Қазақстан тарихы кафедрасының оқытушысы Бекбауова Ж.М. Ақпараттық технологиялар факультетінің 1- ші курс студенттерімен бірге «Қазақ хандығынан Қазақстан Республикасына дейінгі мемлекеттік құрылымның эволюциясы» атты 25 қазан Республика күніне орай ашық сабақ өткізді.25-ші қазан – Республика күні. Бұл мереке тек мемлекеттіліктің жаңаруы ғана емес, ұзын тарихтың, ғасырлар бойы күрескен ұлттың жемісі. Осы тарихтың терең тамыры Қазақ хандығына дейін барады. Қазақстан тарихы – ұзақ және күрделі эволюция жолы. Қазақ хандығының құрылуынан Қазақстан Республикасының тәуелсіздік алғанға дейінгі кезең мемлекеттік құрылымның бірнеше сатыдан өткенін көрсетеді. Бұл эволюция сыртқы әсерлерге, ішкі қайшылықтарға және халықтың ұмтылыстарына байланысты болды.

XV ғасырда құрылған Қазақ хандығы – қазақ халқының мемлекеттілікке ұмтылысының айқын дәлелі. Әсіресе, Жәнібек пен Керей хандардың бастамасымен құрылған бұл хандық, орталықтандырылған билік жүйесін орнатуға, қазақ жерін біріктіруге, сыртқы жаулардан қорғауға бағытталған маңызды қадам болды. Хандықтың кезеңі қазақ халқының саяси, экономикалық, мәдени дамуына зор ықпал етті. Әр түрлі тарихи кезеңдерде хандықтың шекаралары өзгергенімен, қазақ мемлекеттілігінің тұтастығын сақтауда маңызды рөл атқарды. Республика күні – бұл тек мерекелік күн емес, сонымен қатар, өзіміздің тарихи жауапкершілігімізді түсінуге, өткенге деген құрметіміз бен болашаққа деген сенімімізді нығайтуға шақыру. Еліміздің тәуелсіздігін сақтап, оны дамыту – біздің әрбіріміздің міндетіміз. Қазақстанның болашағы – біздің қолымызда!- деген пікірлер студенттер тарапынан айтылды. Сабақтың негізгі мақсаты - патриотизмді, азаматтық жауапкершілікті, елге деген сүйіспеншілікті және ұлттық мақтаныш сезімін қалыптастыру. Елдің болашағына жауапкершілікпен қарауға және өз үлестерін қосуға шабыттандыру болса, сабақ мақсатына жетті деп ойлаймыз.