«БАҚ мамандарын даярлау бастаулары және жаңа бағыттары»

ҚазҰУ-да осындай тақырыпта республикалық ғылыми-тәжірибелік конференция өтті. Конференция жұмысын Баспасөз және электронды БАҚ кафедрасы ұйымдастырды. Аталмыш шара негізінен өңірлік БАҚ дамуына бағытталды. Қызылорда, Шымкент, Қызылжар, Астана, Ақтөбе аймақтарынан облыстық, аудандық басылымдардың бас редакторлары, жауапты хатшыларлары, журналистері келіп қатысты. Сонымен қатар Әзірбайжан, Қытай елінен де журналистер шақырылды.

Екі күндік шара барысында аймақтан келген журналистерге профессорлар К.Камзин, Б.Жақып, К.Қабылғазина, С.Барлыбаева, Ш.Нұрғожина, Н.Шыңғысова т.б. «Конвергентті БАҚ нарығына маман дайындаудың жаңа міндеттері», «Дәстүрлі медиа. Жаңа медиа. Әлеуметтік медиа: түйісу немесе қарама-қайшылық алаңы», «Өңірлік медиа кеңістіктің дамуы, проблемалары мен таяу болашағы» тақырыптарында шеберлік-сағаттарын өткізді. Аймақтардан келген БАҚ өкілдерімен жүзбе-жүз кездесіп, мәселелерді бірге талқылап, аймақтарда студенттердің өндірістік тәжірибеден өтудің шешуші жолдары ұсынылды.

Сонымен қатар шара барысында әл-Фараби атындағы ҚазҰУ және «Қазконтент» АҚ арасындағы Ынтымақтастық туралы меморандумға қол қойылды. «Қазконтент» АҚ басқарма директоры Жандос Шолақов өз сөзінде аймақтық БАҚ өкілдерінің басын қосып, игі бастама бастап отырған ғылым орнасына зор алғысын білдіре отырып, алдағы уақытта бірлесе жұмыс атқаруға дайын екендіктерін жеткізді.

Профессор, Қазақстан журналистер Академиясының академигі С.Қозыбаев журналистерді үздіксіз 80 жылдан аса уақыт бойы дайындап келе жатқан Баспасөз және электронды БАҚ кафедрасына «Қазақстан Республикасының үздік журналистік кафедрасы» номинациясы бойынша Қазақстан журналистер Академиясының Құрмет дипломын факультет деканы С.Медеубекұлы мен кафедра меңгерушісі Г.Сұлтанбаеваға табыс етті.

Қатысушы қонақтар бүгінгі бәсекеге қабілетті маман дайындаудағы жаңа бағыттарды ҚазҰУ-дың телерадиокешенінің жаңалықтар қызметінің қазақ, орыс, ағылшын тілдеріндегі жұмыстарының таныстырылымы мен «Ел ғылымының келешегі – жастар» телефильмнің көрсетілімінен айқын байқады. Сондай-ақ, жас блогерлерді қолдау мақсатында жаңа медиаға өз үлестерін қосып жүрген студенттер арасында ұйымдастырылған «Ұлттық блогиада» байқауының жеңімпаздары марапатталды.

Шара барысында «Фотожурналистика» саласы да назардан тыс қалмай, Қытайдан арнайы келген Алтай аймақтық фотосуретшілер қоғамыныңмүшесі, халықаралық фотобайқаулардың жүлдегері, этнография және табиғат түсірілімдерінің шебері Бақытхан Әсетұлының арнайы шығармашылық сағатын тыңдады.

Қорыта айтқанда, журналистік білім берудегі түйіткілді мәселелер мен мүмкіндіктер талқыланған, білім беруші мен жұмысқа алушы мамандар арасындағы байланысты нығайта түскен осындай игі басталамар қазіргі қоғамға қажет-ақ.

Әйгерім Әлімжан,

Әл-Фараби атындағы ҚазҰУ,

журналистика факультетінің аға оқытушысы