Ғ.Қ. Омаровтың дәрісі: музейлік археология және археологиялық мұраларды зерттеу әдістері

Тұрақты даму мақсаттарының (ТДМ) №17 "Мақсатқа қол жеткізу үшін ынтымақтастық" бағыты аясында Әбіш Кекілбаев атындағы Маңғыстау облыстық тарихи-өлкетану музейінің қызметкерлері әл-Фараби атындағы ҚазҰУ-дың Тарих факультеті, Археология, этнология және музеология кафедрасында ғылыми тағылымдама және ғылыми біліктіліктен өтуде.

Тағылымдама барысында тарих ғылымдарының кандидаты, доцент Ғ.Қ. Омаров "Музейлік археология: музей негізінде археологиялық зерттеу жобаларын жүзеге асырудың маңызы, практикалық археология және археологиялық мұраларды зерттеу әдістері" тақырыбында дәріс оқыды.

Дәріс барысында археологиялық мұраларды сақтаудың негізгі әдістері, оларды ғылыми айналымға енгізу және музейлерде қолдану тәжірибелері кеңінен талқыланды. Ғ.Қ. Омаров археологиялық мұраларды музей экспозицияларына қосу, оларды көпшілікке таныстырудың тиімді әдістері және зерттеу жұмыстарының нәтижелерін музейлік ортада қолданудың маңыздылығын атап өтті. Сонымен қатар, археологиялық қазбалар кезінде алынған материалдарды сақтап, жүйелеу әдістеріне тоқталды.

Дәріс тағылымдама қатысушыларына археология мен музей ісінің тығыз байланысы туралы түсінік беріп, археологиялық жәдігерлерді қорғау және зерттеу бағытында жаңа білім мен дағдыларды игеруіне мүмкіндік берді.