География және табиғатты пайдалану факультетінің №4 Студенттер үйінде оқу залы ашылды

Әл-Фараби атындағы Қазақ ұлттық университеті  география және табиғатты пайдалану факультетінің №4 Студенттер үйінде 2024 жылдың 25 қарашасында жаңа оқу залы ашылды. Бұл жаңалыққа студенттеріміз елең етіп, қатты қуанды десек, артық болмас! Өйткені, студенттерімізге арналған жаңа оқу залында барлық жағдай жасалған. Атап айтсақ, жаңа  оқу залында кез келген салаға арналған ғылыми-көпшілік оқулықтар, оқу құралдары, көркем әдебиет түрлері және газет-журналдарды табуға болады. Жаңа оқу залы заманауи стильде жасақталып, жаңа жиһаздармен жабдықталған. Жаңа оқу залының ашылуына факультетіміздің барлық кафедра профессорлары мен оқытушылар құрамы атсалысты.  Тағы бір ерекше атап өтетін жайт, жаңа оқу залында факультетіміздің академик, профессорларының  оқу жүйесінде оқытылатын ғылыми еңбектері де қойылды. Бұл ғылыми еңбектер студенттеріміз үшін таптырмас құнды дүниелерге толы баға жетпес мұра болып табылады.

№4 Студенттер үйінде ашылған жаңа оқу залының ашылу рәсіміне Әлеуметтік-тәрбие департаментінің директоры Есімова Жұлдыз Дәпенқызы да қатысты. Студенттер үйіндегі жаңа оқу залында студенттер үшін барлық жағдай жасалынып отыр.

Жаңа оқу залының ашылуы – жастардың білімдерін жетілдіру үшін  жасалған тамаша мүмкіндік! Жарық әрі кең, заманауи жабдықталған бұл зал студенттердің шығармашылықпен айналысуына және сабақтарына тиімді дайындалуына ықпал етері сөзсіз. Факультетіміздегі бұл бастама жалғасын табатынына күмәніміз жоқ!  Студенттерге арналған оқу залының болашақта жаңа ғылыми еңбектер, оқулықтармен толықтырылып, жас буынның жан-жақты дамуына үлкен септігін тигізеді. Осындай игі бастамалар басқа факультеттерде де жалғасын  тапса деп ойлаймыз!