БҰҰ-ның 80 жылдығына орай тұрақты даму стратегияларын талқылау

2025 жылдың 16 қаңтарында Алматыдағы UN Plaza кеңсесінде БҰҰ академиялық аймақтық ақпараттық ресурстық орталығының директоры Деловарова Л.Ф., Тұрақты даму жөніндегі ЮНЕСКО кафедрасының меңгерушісі Базарбаева Т.А., Журналистика және коммуникация жөніндегі ЮНЕСКО кафедрасының меңгерушісі Ошанова О.Ж., Пан Ги Мун атындағы Тұрақты даму институтының директоры Мұхтар Л.К. мен БҰҰ-ның Қазақстандағы Жаһандық коммуникациялар департаментінің өкілі Властимил Самек арасында маңызды кездесу өтті. Бұл кездесу 2025 жылы атап өтілетін БҰҰ-ның 80 жылдық мерейтойы аясында өтті. Бұл мерейтой тұрақты даму саласындағы, атап айтқанда білім беру мен әлеуметтік өзгерістердегі көпжақты ынтымақтастық пен ұжымдық күш-жігердің маңыздылығын көрсетеді.

Кездесу барысында тараптар ынтымақтастықтың стратегиялық бағыттарын талқылап, студенттер мен қоғамды тұрақты даму мәселелеріне тарту мен олардың хабардарлығын арттыруға арналған жобаларды жүзеге асыру туралы идеялармен бөлісті. Климаттық өзгерістермен күресу және әлеуметтік теңсіздікті азайту үшін практикалық шешімдерді енгізудің маңыздылығына ерекше назар аударылды. Властимил Самек ҚазҰУ мен БҰҰ арасындағы серіктестіктің қойылған мақсаттарға жетудегі маңыздылығын атап өтті.

Кездесу нәтижесінде аймақта тұрақты дамуды ілгерілетуге ықпал ететін бірқатар бастамаларды бірлесіп әзірлеу және іске асыру туралы келісімге қол жеткізілді. Бұл мерейтой барлығымыз үшін тұрақты және әділетті болашақ құру жолындағы жұмысты жалғастыруға шабыт беріп, жаһандық мақсаттарды жүзеге асыру үшін осындай кездесулердің маңыздылығын көрсетеді.