«Тұрақты даму үшін серіктестік» ТДМ аясында Шығыстану факультетінің өкілдері Үндістанның Республика күніне арналған салтанатты жиынға қатысты.

2025 жылғы 27 қаңтарда әл-Фараби атындағы Қазақ ұлттық университетінің Шығыстану факультеті Үндістан Республикасының күніне арналған салтанатты кездесуге қатысты. Алматыда өткен іс-шара дипломатиялық корпус өкілдерін, оқытушыларды, студенттерді және қонақтарды біріктірген жарқын мерекеге айналды.

Кездесуге Үндістан Республикасының Қазақстандағы Төтенше және Өкілетті Елшісі – Т.В. Нагендра Прасад мырза, ҚР Сыртқы істер министрлігінің Алматы қаласындағы Өкілдігінің басшысы, Ерекше тапсырмалар жөніндегі Елші Жәнібек Абдрашов және басқа да құрметті қонақтар қатысты. Іс-шараның атмосферасы қуаныш пен достыққа толы болды, қатысушылар Үндістанның мәдениеті мен дәстүрлеріне деген жылы ықыласын және құрметін білдірді.

Мерекелік бағдарлама аясында үнді және қазақ ұлттық билері орындалып, бұл екі ел арасындағы достық пен мәдени алмасудың белгісі болды.

Шығыстану факультеті іс-шараны ұйымдастырушыларға осы мерекелік оқиғаның бір бөлігі болуға мүмкіндік бергені үшін алғысын білдіреді және Қазақстан мен Үндістан арасындағы мәдени байланыстардың одан әрі нығаюына үміттенеді.

​​​​​​​