Әл-Фараби атындағы ҚазҰУ-да "Visit Shymkent" делегациясымен кездесу өтіп, ынтымақтастық туралы келісімге қол қойылды

2025 жылғы 30 қаңтарда Әл-Фараби атындағы Қазақ ұлттық университетінде Шымкент қаласы туризм және сыртқы байланыстар басқармасының "Visit Shymkent" туристік ақпараттық орталығы делегациясымен кездесу өтті. Іс-шара аясында өзара түсіністік туралы меморандумға қол қойылып, Рекреациялық география және туризм кафедрасының студенттері мен оқытушы-профессорлық құрамы үшін көшбасшылық дәріс өткізілді.

"Visit Shymkent" делегациясын орталық басшысы Ерлан Сүндікович Умаров бастап келді. Сондай-ақ, делегация құрамында іс-шаралар бөлімінің жетекшісі Арайлым Әбілда, дизайн және ақпарат бөлімінің менеджері Аяжан Ештаева және білікті гид-экскурсовод Ержан Орынбасар болды.

ҚазҰУ тарапынан қатысушыларды Басқарма төрағасының орынбасары – университеттің бірінші проректоры Еркін Ерманұлы Дүйсенов қарсы алды. Сонымен қатар, кездесуге География және табиғатты пайдалану факультетінің деканы Әлия Сағындыққызы Ақтымбаева, Рекреациялық география және туризм кафедрасының меңгерушісі Руслан Мұратұлы Байбуриев.

Кездесу ҚазҰУ мұражайына экскурсиямен басталып, кейін университеттің конференц-залында туризм және рекреация саласындағы ынтымақтастықты дамыту мәселелерін талқылаумен жалғасты. Қатысушылар өзара пікір алмасып, бірлескен жобаларды іске асыру және академиялық, кәсіби байланысты нығайту мүмкіндіктерін қарастырды.

Маңызды іс-шаралардың бірі ҚазҰУ кітапханасына бару болды. Онда География және табиғатты пайдалану факультетінің оқытушылары мен студенттеріне арналған материалдардың таныстырылымы өтті. Сондай-ақ, туризм саласының болашақ мамандарының кәсіби құзыреттерін дамытуға бағытталған көшбасшылық дәріс ұйымдастырылды. Іс-шараны жүргізген модератор, кафедра докторанты – Суранчиева Ел-Дана Аманжолқызы.

Бұл іс-шара Әл-Фараби атындағы ҚазҰУ мен "Visit Shymkent" туристік ақпараттық орталығы арасындағы серіктестік қатынастарды нығайтудағы маңызды қадам болды және туризм, рекреация және академиялық алмасу саласындағы ынтымақтастықтың жаңа мүмкіндіктерін ашты.