Мен, Ерғалиев Иса Бибитұлы, Қытайтану кафедрасында оқимын. Үшінші курсымның бірінші семестрінде академиялық ұтқырлық бағдарламасына қатысып, Қытайға бару мүмкіндігі пайда болды. Біз, ҚазҰУ студенттерінен тұратын топ, Шандунь провинциясындағы Цзинин қаласына, Цзинин политехникалық университетіне келдік. Біз сол университетте оқыған алғашқы қазақстандық студенттер болдық.
Қытайға келіп, бізді өте жылы қарсы алды, әсіресе кураторыбыз Лю Лаоши (吕老师) ерекше көмек көрсетті, ол кез келген мәселе бойынша бізге қолдау көрсетіп, ешқашан қиын жағдайда жалғыз қалдырған жоқ. Қытай мәдениеті бізге алғашқы күннен бастап әсер етті, бірінші курстан бастап армандағанымыздың бәрі шындыққа айналып, біз қытай атмосферасына терең бойлай бастадық.
Университетіміз шетелдік студенттер мен қытайлық студенттер арасында әртүрлі іс-шаралар өткізді. Бізге каллиграфия сабағы, ұлттық тағамдарды дайындау, музыкалық сайыстар өткізілді. Сонымен қатар, университет жақын маңдағы қалаларды аралауға, көне қытайлық ғимараттармен танысуға, тарихи жәдігерлер музейлерін көруге мүмкіндік берді.
Қытай тілімізді үш есе жақсартты, оны бізге оқытушылар мен жаңа достарымыз үйретті. Жалпы, Қытай менің жүрегімде терең із қалдырды, мен бұл керемет елге мүмкіндігінше тезірек қайта оралуға тырысамын.
Басқа жаңалықтар
