Мен, Жанаділ Ақбота, 3-курс 1-семестрінде академиялық ұтқырлық бағдарламасы бойынша Қытайдың Цзинин қаласында оқыдым. Бұл арманымды жүзеге асырып, ұмытылмас тәжірибе алуыма біздің Қытайтану кафедрасының оқытушылары көмектесті. Олар бізге мүмкіндіктер туралы ақпарат беріп, осы сапарға дайындады. Ұстаздарымыздан алған біліміміздің арқасында шетелде өзімізді сенімсіз сезінбедік, өйткені біз бәріне дайын болдық. Осы алты ай ішінде мен қытай тілі деңгейімді көтеріп, бұрыннан қызыққан қытай мәдениетімен жақынырақ таныстым: шай рәсімі, асханасы, каллиграфия, мифология және қытайдың жауынгерлік өнері (ушу). Бұл іс-шаралардың барлығы оқу бағдарламасына енгізілген еді. Сондай-ақ, маған Қытай теледидарында қытай мәдениеті туралы бағдарламаға екі рет қатысу мүмкіндігі туды. Онда біз хулу (асқабақ) жасайтын шеберханаға, орталық канал мұражайына және т.б. бардық. Көптеген керемет адамдармен танысып, олардан көп нәрсе үйрендім және мен де оларға көп нәрсе үйреткенімді айтты. Бұл достарыммен әлі күнге дейін WeChat арқылы байланысып тұрамыз. Сонымен қатар, біз Шанхай, Цюйфу, Хэцзэ, Цзинань сияқты қалаларды көрдік. Әр қала өзінше ерекше, өз атмосферасы, дәстүрлері және тарихы бар. Әр сапарымыз қуаныш пен жаңа әсерлерге толы болды.
