Тұрақты даму мақсаттарының «Тұрақты қалалар және елді мекендер» тармағы аясында «Иранның туристік тартымдылықтары» атты дәрістер басталды

Гүлістан үйірмесі "Иранның туристік тартымдылықтары" атты танымдық дәрістер легін бастады. Алғашқы дәрісте ирантану бөлімі студенттері Иран астанасы Тегеран қаласының көрнекті орындары туралы мол мағлұмат алды. Студенттерге Иранның тәуелсіздік символына айналған «Азади» мұнарасы, сондай-ақ «Милад» телемұнарасының сәулеттік ерекшеліктері мен тарихи маңызы таныстырылды. Сонымен қатар, танымдық дәрісте «Голестан сарайы», «Иран ұлттық музейі», «Өнер музейі» және «Кілем музейі» сияқты маңызды мәдени нысандар таныстырылды. «Голестан сарайы» – Қаджар әулетінің резиденциясы болған тарихи кешен, ал Иран ұлттық музейі – елдің бай тарихи мұрасын қамтитын ең ірі музей. «Өнер музейі» әлемдік деңгейдегі өнер туындыларын сақтаса, «Кілем музейі» иран кілем тоқу өнерінің үздік үлгілерін ұсынады. Бұл дәріс студенттердің Иранның мәдени мұрасына деген қызығушылығын арттырып, олардың білімдерін кеңейтуге мүмкіндік берді.