«Жэньминь жибао» газеті қазақстандық ғалымның Дүниежүзілік қытайтанушылар конгресіне қатысуын жариялады

Қытайдың беделді «Жэньминь жибао» басылымы 2024 жылдың 24 қазанынан 4 қарашасына дейін Фуцзянь провинциясының Наньпин қаласында Қытайдың халықаралық алмасу қауымдастығы мен Фуцзянь Халық Үкіметінің қолдауымен өткен Екінші Дүниежүзілік қытайтанушылар конгресі туралы мақала жариялады. Бұл іс-шараға 60 елден 200-ден астам маман қатысып, қытай өркениеті мен қазіргі әлем арасындағы өзара әрекеттестік мәселелерін, сондай-ақ халықтар арасындағы мәдени диалогты нығайтуды талқылады.

Мақалада әл-Фараби атындағы Қазақ ұлттық университетінің қытайтану кафедрасының доценті Фатимабиби Ноғайқызы Даулеттің ғылыми қызметіне ерекше назар аударылған (https://www.peopleapp.com/column/30048216623-500006084767). Өз сұхбатында ол Қазақстанда қытай тілі мен мәдениетін насихаттау бойынша көпжылдық жұмысы туралы айтып, екі ел арасындағы академиялық және мәдени ынтымақтастықтың маңыздылығын атап өтті.

«Жэньминь жибао» басылымының хабарлауынша, Фатимабиби Ноғайқызы 25 кітаптың, оның ішінде оқулықтар мен сөздіктердің авторы, сондай-ақ Қытай туралы қазақ тіліндегі алғашқы ғылыми-көпшілік кітапты жазған. Бұл еңбек қытай мәдениеті туралы қалыптасқан стереотиптерді жоюға және халықтарды жақындастыруға бағытталған. Оның Қазақстандағы қытайтану ғылымының дамуына қосқан үлесі халықаралық әріптестері тарапынан жоғары бағаланып, оның бастамалары Қазақстан мен Қытай арасындағы ғылыми және білім беру байланыстарын кеңейтуге ықпал етеді.

«Жэньминь жибао» басылымындағы бұл жарияланым қазақстандық ғалымдардың халықаралық ғылыми форумдарға қатысуының маңыздылығын көрсетіп, Қазақстанда қытайтануға деген қызығушылықтың артуын және отандық зерттеушілердің өркениеттер арасындағы жаһандық диалогты дамытуға қосқан үлесін айқындайды.