ҚазҰУ Шығыстану факультетінің басшылығы қытайлық әріптестерін Шамдар мерекесімен құттықтады

2025 жылдың 11 ақпанында Алматыдағы Қытай Халық Республикасының Бас консулдығы Қытайдың дәстүрлі Шамдар мейрамына (元宵节) арналған салтанатты шара өткізді. Абай атындағы опера және балет театрында «Көктем мейрамын ықыласпен қарсы алу: Қытай Жаңа жылын бірге тойлайық» атты кең көлемді мерекелік іс-шара ұйымдастырылып, оған Қытаймен ынтымақтастық орнатқан мекемелердің өкілдері мен көптеген құрметті қонақтар шақырылды.

Салтанатты кеште Алматыдағы ҚХР Бас консулы Цзян Вэй ханым сөз сөйлеп, қазақ-қытай қарым-қатынастарын «алтын ғасыр» кезеңі деп атап, олардың болашақта одан әрі нығайып, жаңа биіктерге жететініне сенім білдірді.

Бұл ерекше мерекеге әл-Фараби атындағы ҚазҰУ Шығыстану факультеті мен Қытайтану кафедрасының ұжымы да қатысты. Факультет деканы Наталья Борисовна Ем қытайлық серіктестермен бірге мерекелік кешті атап өтіп, оларды Көктем мейрамымен құттықтады.

Салтанатты шараның шарықтау шегі қазақ және қытай эстрада жұлдыздарының қатысуымен өткен концерттік бағдарлама болды. Қонақтар кәсіби бишілердің, цирк әртістерінің, сиқыршылардың және дәстүрлі қытай музыкасын орындаушылардың өнеріне тәнті болып, нағыз мерекелік атмосфераны сезінді.