Шетелдегі академиялық ұтқырлық бойынша ақпараттық кездесу

2025 жылдың 14 ақпан күні Шығыстану факультеті Халықаралық мобильділік және бағдарламалар кеңсесімен бірлесіп «Халықаралық академиялық ұтқырлық бағдарламаларына қатысу мүмкіндіктері» тақырыбында студенттерге арналған онлайн ақпараттық кездесу өткізді.
Кездесудің мақсаты – білім берудің сапасын халықаралық ақпараттық қоғамға бейімделген жаңа мамандарды тәрбиелеу арқылы арттыру. Қазіргі таңда академиялық ұтқырлықты серіктес жоғары оқу орындар арасында студенттер алмасудың тиімді формасы ретінде таныстыру.
Халықаралық мобильділік және бағдарламалар кеңсесінің қызметкерлері студенттерге академиялық ұтқырлық бағдарламаларына қатысу ережелері, тұрақты шетелдік серіктес университеттер жайлы, тіл үйрену мүмкіндіктері туралы толық таныстырылым жасады. Сонымен қатар, әр семестрде шетел университеттеріне оқуға барғысы келетін студенттер үшін университет тарапынан барлық мүмкіндіктер жасалғандығын жеткізді.
Факультеттің 1-3 курс студенттері қызметкерлерге академиялық ұтқырлық, шетелдік студенттермен қарым-қатынас, байқауға дайындық бойынша өз сұрақтарын қойды. Нәтижесінде студенттер ең өзекті сұрақтарға жауап ала алды, мысалы: академиялық ұтқырлыққа қалай тапсыру керек, байқауға қатысуға қойылатын талаптар, виза мәселелері және т.б. Жалпы академиялық ұтқырлыққа қатысу мүмкіндіктері студенттерді қатты қызықтырды.