2025 жылдың 12 наурызында 4-ТДМ «Сапалы білім» аясында Радиоэлектроника және байланыс әскери-инженерлік институтында «Абай мұрасы – рухани құндылық» тақырыбында ашық тәрбие сағаты өтті. Аталмыш іс-шараны әл-Фараби атындағы ҚазҰУ-дың қазақ әдебиеті және әдебиет теориясы кафедрасының аға оқытушысы, ф.ғ.д. Г.Ж. Болатова, педагогика және білім беру менеджменті кафедрасының доценті, пед.ғ.к. Б.И. Иманбекова, сондай-ақ жалпы және қолданбалы психология кафедрасының профессоры м.а., психол.ғ.к. Н.С. Жұбаназарованың жетекшілігімен «8D02304 – Әдебиеттану» мамандығының 1-курс докторанттары ұйымдастырды.
Ашық тәрбие сағатының мақсаты – биыл 180 жылдық мерейтойы аталып өтетін рухани реформатор – Абай Құнанбайұлының шығармашылығы мен рухани мұрасын дәріптеу, ақынның білім мен ғылым, шығармашылық даму тұрғысындағы жастарға берер мол мұрасын жаңғырту, сондай-ақ адамгершілік құндылықтарды саралау. Ашық тәрбие сағаты докторанттардың «Абайдың кісілік кодексі», «Метамәтін. Көзімнің қарасы» тақырыптарындағы мазмұнды әрі танымдық баяндамаларымен басталды. Әл-Фараби атындағы ҚазҰУ-дың жоғары оқу орнына дейінгі дайындық кафедрасының студенттері мен Радиоэлектроника және байланыс әскери-инженерлік институтының 2-курс курсанттары Абай Құнанбайұлының рухани мұрасының мәнін талқылап, ақын өлеңдерін қазақ және ағылшын тілдерінде оқып, әндерін орындады, күй тартты.
Педагогикалық тәжірибе аясында өткен бұл ашық тәрбие сағатын ұйымдастыруға «8D02304 – Әдебиеттану» мамандығының 1-курс докторанттары Қайыңбай Дана, Кенжеқожаева Алма, Тойбазар Аяжан, Алмасханқызы Арайлым, Елдос Екпін, Тұрдәлі Талғат белсенді атсалысты. Іс-шара соңында Абайдың өмірі мен шығармашылығына қатысты сұрақ-жауап ұйымдастырылып, студенттер мен курсанттар белсенділік танытты. Сондай-ақ өнер көрсеткен белсенді қатысушыларға Абайдың даналық сөздері топтастырылған құнды кітаптар сыйға тартылды. Радиоэлектроника және байланыс әскери-инженерлік институтының мемлекеттік тіл кафедрасының доценті Атейбекова Кенже Базильджанқызы ашық тәрбие сағатын ұйымдастырушы докторанттарға алғыс хаттарын табыстап, жылы лебізін білдірді.
Аталмыш іс-шара студенттердің Абай мұрасындағы рухани құндылықтар жүйесін тануына, ақын шығармаларының мән-мағынасына терең үңілуіне, адамгершілік қағидаларын ұстануына және білім мен ғылымды игеруде ақын атап өткен қағидаларды түрлі жағдаяттарда тиімді пайдалануына негіз болады деп санаймыз.
