О.М. Жолымбаевтың әл-Фараби атындағы ҚазҰУ-дегі баяндамасы

2025 жылғы 2 сәуірде әл-Фараби атындағы Қазақ ұлттық университетінде "Шәкәрім атындағы университеті" Педагогикалық зерттеулер ғылыми орталығының басшысы О.М. Жолымбаевтың "Әлемдік және отандық тәжірибедегі кілт сөздерді зерделеу негізінде педагогикалық зерттеулердің трендтері мен үрдістерін анықтау" тақырыбында ғылыми баяндамасы өтті.

Баяндама механика және математика факультетінде өткізіліп, ғылыми қауымдастықтың, докторанттардың, жас зерттеушілер мен оқытушылардың үлкен қызығушылығын тудырды. Оралтай Мұратханұлы өз сөзінде Scopus және PubMed сияқты ірі халықаралық ғылыми дерекқорларда, сондай-ақ «ҚазҰУ Хабаршысы» педагогикалық сериясындағы отандық басылымдарда қолданылған кілт сөздерге жүргізілген талдау нәтижелерін ұсынды.

Баяндаманың негізгі бөлігінде білім беру жүйесі жоғары дамыған елдердегі (Жапония, Түркия, Сингапур) ғылыми мақалаларда жиі кездесетін кілт сөздер мен Қазақстандағы зерттеу бағыттарының арасындағы ұқсастықтар мен ерекшеліктерге назар аударылды. Спикер кілт сөздерді сараптау арқылы ғылымдағы «қызу нүктелерді» анықтап қана қоймай, болашақтағы ғылыми басымдықтарды болжауға болатынын атап өтті.

Баяндама соңында О.М. Жолымбаев кілт сөздер базасын білім беру бағдарламалары мен ғылыми саясатты трансформациялаудың тиімді құралы ретінде пайдалануды ұсынды.

О.М. Жолымбаевтың баяндамасы БҰҰ жариялаған Тұрақты даму мақсаттарымен (ТДМ) тығыз байланысты. Атап айтқанда, ұсынылған әдістер мен кілт сөздерге жүргізілген талдау ТДМ 4 – «Сапалы білім» мақсатына жетуге ықпал етіп, педагогика саласындағы ғылыми зерттеулердің нақты бағытталуын қамтамасыз етеді. Сонымен қатар, ТДМ 9 – «Индустрия, инновациялар және инфрақұрылым» мақсатына сәйкес ғылыми инфрақұрылым мен білім беру бағдарламаларын дамытуға арналған инновациялық тәсілдерді қалыптастыруға мүмкіндік береді.

Іс-шара педагогика саласындағы ғылымды дамыту перспективаларын талқылауға және зерттеу тәжірибесіне жаңа аналитикалық тәсілдерді енгізуге арналған маңызды алаңға айналды.

Иманбердиев Канжарбек,

Математика кафедрасының меңгерушісі

Мухамбеткалиев Мурат,

Математика кафедрасының оқытушысы