Электроника және астрофизика кафедрасының студенттерінің Almaty Museum of Arts мұражайына баруы

2025 жылғы 18 қыркүйекте сыныптан тыс білім беру іс-шарасы аясында «Физика және астрономия» мамандығының 3-курс студенттері мен 1-курс магистранттары кешкі уақытта Almaty Museum of Arts мұражайына барды. Топқа Электроника және астрофизика кафедрасының оқытушысы Надежда Вайдман жетекшілік етті.

Мұражайдың негізін қалаған коллекционер және меценат Нұрлан Смағұлов, ол елімізде алғаш рет осындай кеңістік ашты. Мұражай жақында ғана ашылып, біздің сапар студенттерге экспозициялармен алғашқылардың бірі болып танысуға мүмкіндік берді.

Бірінші қабатта студенттер «Ұлы дала» және «Сарыарқа» залдарын аралап, онда Алмагүл Менлибаеваның «Мен бәрін түсінемін» атты ретроспективасымен және «Қонақтар» көрмесімен танысты. Ерекше әсер қалдырған бөлімдердің бірі — Ричард Серраның ауқымды лабиринт түріндегі инсталляциясы ұсынылған шығармашылық залы болды.

Екінші қабатта студенттер заманауи өнердің әлемдік жұлдыздары — Ансельм Кифер, Билл Виола және Яёи Кусаманың туындыларымен танысты. Жарқын әрі иммерсивті жұмыстар студенттердің шынайы эмоцияларын тудырып, қызу пікірталастарға себеп болды.

Мұражай коллекциясында 700-ден астам шығарма бар, оған ХХ ғасырдағы қазақстандық шеберлердің туындылары да, Қазақстан, Орталық Азия және шетелдің заманауи авторларының еңбектері де кіреді.

Бұл сапар студенттер үшін маңызды мәдени оқиға болды: олар дүниетанымдарын кеңейтіп, заманауи көркемдік өрнектермен жақынырақ танысып, тұтас ғылыми-гуманитарлық дүниетанымды қалыптастыруға ықпал ететін тәжірибе жинақтады.