ТДМ аясында ғылыми семинар: денсаулық, экожүйелерді қорғау және жауапты тұтыну мәселелері

2025 жылдың 2 қазан күні молекулалық биология және генетика кафедрасында Біріккен Ұлттар Ұйымының Тұрақты даму мақсаттарын (ТДМ) жүзеге асыруға арналған ғылыми семинар өтті. Семинардың негізгі тақырыптары: ТДМ 3 — Денсаулық пен әл-ауқат, ТДМ 12 — Жауапты тұтыну және өндіріс (қоршаған ортаның әртүрлі заттармен ластануы және оның экожүйелерге әсері мәселелерін қоса алғанда).

Семинарға бірінші курс докторанттары қатысты. Олар алғаш рет өздерінің болашақ диссертациялық жобаларын көпшілік назарына ұсынды. Баяндамаларында олар ғылыми жаңалықтар мен зерттеулердің өзектілігін, қойылған мақсаттар мен міндеттерді, зерттеулердің адам денсаулығына, су ресурстарын қорғауға және қоршаған ортаның ластануын азайтуға практикалық маңызын, сондай-ақ диссертациялық жолда бағыт-бағдар беретін ғылыми жетекшілердің рөлін атап өтті.

Докторанттардың сөздері оқытушылар мен студенттердің қызу талқылауына себеп болды. Мұндай іс-шаралар ғылыми идеялар алмасуға ғана емес, сонымен қатар жас ғалымдардың өз еңбектерінің жаһандық маңызын түсінуіне ықпал ететіні атап өтілді.

Бұл семинар кафедраның ғылыми өміріндегі маңызды қадам болып, молекулалық биология мен генетика саласындағы зерттеулердің адам денсаулығын сақтаудан бастап қоршаған ортаны қорғауға дейінгі өзекті жаһандық міндеттерді шешумен тікелей байланысты екенін тағы да көрсетті.

Молекулалық биология және генетика кафедрасы

PhD Қуанбай Әйгерім