Women in Tech ұйымымен ынтымақтастық: цифрлық білім мен гендерлік теңдікті ілгерілетудегі жаңа мүмкіндіктер. ТДМ 4 және ТДМ 5

Әл-Фараби атындағы Қазақ ұлттық университетінде Women in Tech халықаралық ұйымының өкілдерімен кездесу өтті. Кездесу барысында цифрлық білім беру, инновациялар және әйелдердің ғылым мен технология салаларындағы мүмкіндіктерін кеңейту бағытындағы ынтымақтастық мәселелері талқыланды.

Ұйым өкілдері Women in Tech қызметінің негізгі бағыттары туралы айтып, жетекші жоғары оқу орындарымен серіктестік, студенттерге арналған мотивациялық іс-шараларды ұйымдастыру және цифрлық дағдыларды дамытуға бағытталған білім беру бастамалары туралы ақпарат берді.
Ағымдағы жылы Ұлыбританияның De Montfort University университетімен өзара ынтымақтастық туралы меморандумға қол қойылғаны, сондай-ақ IT университеті және Халықаралық ақпараттық технологиялар университетімен (МУИТ) бірлескен оқу бағдарламасын әзірлеу жұмыстары жүргізіліп жатқаны атап өтілді.

Ұйым өкілдері Women in Tech бастамасы қаржылық қолдау талап етпейтін, қоғамдық негізде жұмыс істейтін ұйым екенін, ал оның басты мақсаты – студенттерді, әсіресе қыздарды кәсіби және тұлғалық дамуда қолдау екенін атап өтті. 

ТДМ аясындағы бірлескен бастамалар

Women in Tech ұйымымен ынтымақтастық мәселелерін талқылау Әл-Фараби атындағы ҚазҰУ-дың стратегиялық басымдықтарына толық сәйкес келеді және БҰҰ-ның Тұрақты даму мақсаттарын (ТДМ) ілгерілетуге бағытталған:

• ТДМ 4 – Сапалы білім беру: студенттердің цифрлық және зерттеу құзыреттерін дамыту, заманауи академиялық ортаны қалыптастыру арқылы;

• ТДМ 5 – Гендерлік теңдік: қыздар мен әйелдердің STEM салаларына қатысуын арттыру, мансаптық өсу мен көшбасшылыққа қолайлы жағдай жасау арқылы.