Ғылыми тағылымдама – ТДМ 4 Сапалы білім және ТДМ 17 Халықаралық ынтымақтастық

Плазма физикасы, нанотехнология және компьютерлік физика кафедрасының 3-курс докторанты Әбдрахманов Азамат Еркінұлы 2025 жылғы 16 тамыз бен 17 қазан аралығында Киото технологиялық институтында (Киото қ., Жапония) ғылыми тағылымдамадан өтті. Тағылымдаманың басты мақсаты – докторанттың диссертациялық зерттеуі аясында халықаралық ғылыми ынтымақтастықты дамыту, тәжірибе алмасу, және бірлескен ғылыми-зерттеу жұмыстарын жүргізу болды.

Тағылымдама барысында Азамат Еркінұлы таза бөлме (clean room) зертханасында XPS (X-ray Photoelectron Spectroscopy) анализ жүргізді. Бұл әдіс үлгілердің элементтік құрамын, химиялық байланыс күйін және беттік құрылымын жоғары дәлдікпен анықтауға мүмкіндік береді. Алынған тәжірибе докторанттың ғылыми даярлығын тереңдетіп, диссертациялық жұмыстың сапасын арттыруға және ғылыми мақалалар дайындауға үлес қосты.

Сонымен қатар, тағылымдама шеңберінде докторант халықаралық зерттеушілермен кәсіби байланыстар орнатып, семинарлар мен зерттеу топтарының жиналыстарына қатысып, академиялық тәжірибе жинақтады. Бұл іс-шара ТДМ 4 – Сапалы білім және ТДМ 17 – Халықаралық ынтымақтастық мақсаттарына сәйкес докторанттың академиялық әлеуетін арттыруға және кафедраның халықаралық байланыстарын нығайтуға мүмкіндік берді.

Плазма физикасы, нанотехнология және компьютерлік физика кафедрасы болашақта да әлемдік деңгейдегі университеттермен әріптестікті дамытуды жалғастырады.