Қытайтану кафедрасында қытайдың дипломатиялық дискурсына арналған семинар өтті.

2025 жылдың 6 қарашасында Әл-Фараби атындағы Қазақ ұлттық университетінің Шығыстану факультеті, қытайтану кафедрасында қытай дипломатиялық дискурсының лингвомәдени және аудармалық ерекшеліктеріне арналған ғылыми семинар өтті.

Семинар барысында кафедраның қауымдастырылған профессоры, қытайтанушы Фатимабибі Даулет пен докторант Лина Жунисбек Қытайдың дипломатиялық сыпайылық стратегияларын жан-жақты талдауға арналған зерттеу нәтижелерін таныстырды. Зерттеу қазақстандық ғылымда алғаш рет қытай дипломатиялық дискурсында қолданылатын сыпайылық тетіктерін тек тілдік амалдар ретінде емес, мемлекеттің халықаралық имиджін қалыптастыратын мәдени кодтар жүйесінің көрінісі ретінде қарастыру қажеттігін көрсетті.

Ф. Даулет өз сөзінде қытай дипломатиясындағы сыпайылық тек сөйлеу этикеті емес, мемлекеттің философиялық ұстанымдарын бейнелейтін мәдени құбылыс екенін атап өтті. Оның негізінде үйлесім, ритуалдық тәртіп және эмоциялық өзара құрмет қағидалары жатыр. Бұл қағидалар дипломатиялық сөзді жай ғана әсер ету құралы емес, құрмет, теңгерім және мәдени нәзіктіктің көрінісі ретінде қарастырады.

Семинарда Қытайдың дипломатиялық сыпайылық стратегиясы көпқабатты функция атқаратыны талқыланды: ритуалдық, тұлғааралық және институционалдық деңгей. Эвфемизмдер, модальды құрылымдар, келісім мен такт формулалары серіктестік атмосферасын қалыптастырып, конструктивті диалог жүргізуге ықпал ететіні атап өтілді.

Іс-шара студенттер, оқытушылар және факультет қонақтары тарапынан үлкен қызығушылық тудырды.