«Жаңа Қазақстандағы заң және тәртіп» тақырыбында қонақтық дәріс
«Заң және Тәртіп» жобасы – Қазақстан үшін маңызды бастамалардың бірі. Ол құқықтық тәртіп пен күштік құрылымдарды дамыту арқылы қауіпсіздікті қамтамасыз етуді көздейді және Мемлекет басшысының қыркүйек айындағы Жолдауын іске асыру аясында жүзеге асырылуда.
Жоба шеңберінде әл-Фараби атындағы ҚазҰУ заң факультетінде БҰҰ-ның 4, 16, 17 ТДМ бағыттары бойынша студент жастардың құқықтық сауаттылығын арттыруға бағытталған іс-шаралар өткізілуде. Осыған орай, 2025 жылғы 20 қарашада заң факультетінің түлектері үшін біздің серіктестер – ҚР ІІМ Академиясының мамандары «Жаңа Қазақстандағы заң және тәртіп» тақырыбында қонақтық дәріс өткізді.
Іс-шараның спикері – М.Есбулатов атындағы ҚР ІІМ Алматы академиясы факультетінің бастығы, полиция полковнигі Кан Александр Герасимович. Ол заңдылық пен құқықтық тәртіпті нығайту, киберқауіпсіздік мәселелері бойынша көшбасшылық дәріс оқып, Қазақстандағы жаңа киберқұқықбұзушылық түрлерін және қазіргі кезеңде олардан халықты қорғау әдістерін түсіндірді.
Іс-шараны ұйымдастырушылар: з.ғ.д., әл-Фараби атындағы ҚазҰУ-дың мемлекет және құқық теориясы мен тарихы, конституциялық және әкімшілік құқық кафедрасының доценті Калишева Н.Х., сондай-ақ «Әділ құқық» ғылыми қауымдастығының мүшелері – Жакитов Б., Жаксыбаев Р., Куандыков А., Арезимова С. Жаңадан іске қосылған «Заң және Тәртіп» цифрлық сервисі азаматтардың құқықтық санасын нығайтуға және салауатты өмір салтын насихаттауға бағытталған.
Жалпы, заң мен тәртіп – мемлекеттік саясаттың негізгі қағидаты. Ол азаматтардың қауіпсіздігін қамтамасыз етуді көздейді және мемлекеттен қауіпсіздік, тұрақтылық пен заңдардың барлық азаматтар мен құрылымдар үшін әділ орындалуын талап етеді.
Бұл қағидат құқықтық жүйені, құқық қорғау органдарын нығайтуды, халықтың құқықтық сауаттылығын арттыруды қамтиды және тұрақты әрі қауіпсіз қоғам қалыптастыруға негіз қалайды. Заң мен тәртіп – бұл жай ғана жазалау саясаты емес, демократия мен құқықтық мемлекеттің берік тірегі. Принциптің негізгі құрамдастары: заңның үстемдігі; құқықты қолдану және қауіпсіздік; құқық қорғау органдарының құқықбұзушылықтардың (мысалы, есірткі қылмыстары, лудомания) алдын алуға және азаматтарды қорғауға бағытталған белсенді қызметі; құқықтық ағарту және білім; әлеуметтік тұрақтылық; әділдік және құқықтарды қорғау; жауапкершілік, өйткені принципті жүзеге асыру тек заң қабылдаумен шектелмей, оның қатаң орындалуын талап етеді. Бұл – құқықбұзушылық үшін жаза бұлтартпастығының қалыптасуына негіз болады.
"Мемлекет және құқық теориясы мен тарихы, конституциялық және әкімшілік құқық" кафедрасы