Жақсы денсаулық және әл-ауқат (ТДМ 3)

Актуарлық математика мамандығының студенттері «Жақсы денсаулық және әл-ауқат» тақырыбы бойынша оқу сабағын өткізді. Сабаққа белсенді қатысуды қамтамасыз ету мақсатында топ екі топқа бөлінді.

Бірінші топ салауатты өмір салтын сипаттайтын суреттерді ұсынды: дұрыс тамақтану, дене белсенділігі, күн тәртібі және эмоционалдық әл-ауқат.

Ал екінші топ денсаулыққа зиян келтіретін факторларды сипаттады: зиянды әдеттер, күйзеліс, аз қимылдайтын өмір салты және дұрыс емес тамақтану. Әр топ өз суретін таныстырып, онда көрсетілген әрекеттердің адам денсаулығына әсерін түсіндірді.

Келесі кезеңде студенттер интерактивті тапсырма орындады: әр топ белгілі бір аурудың белгілерін сипаттады, ал қарсы топ сол белгілерге қарап қандай ауру екенін анықтауы керек болды. Бұл тапсырма студенттердің симптомдар мен ағза жағдайының байланысын жақсырақ түсінуіне, сондай-ақ талдау мен сыни ойлау дағдыларын дамытуына көмектесті.

Сабақтың қорытынды кезеңінде студенттер денсаулыққа қатысты мифтер мен ғылыми деректерді талқылады. Олар кең тараған қате түсініктерді ғылыми негізделген ақпаратпен салыстырып, әртүрлі дереккөздерден алынған мәліметтерге сыни тұрғыдан қараудың маңыздылығын атап өтті.

Өткізілген сабақ студенттердің салауатты өмір салты туралы білімін кеңейтіп, олардың саналы көзқарасын арттыруға және өз денсаулығына жауапкершілікпен қарау мәдениетін қалыптастыруға ықпал етті.

Оқытушы: Амантай Т.К.