Археология – пәнаралық өзара әрекеттестік алаңы ретінде

Тұрақты даму мақсаттарының (ТДМ) №17 — «Мақсаттарға қол жеткізу үшін ынтымақтастық»  Халықаралық «Болашақ ғалымдары» жобасы аясында Тарих факультетінде Ресей Ғылым академиясының Археология институтының қызметкері, тарих ғылымдарының кандидаты Решетова Ирина Константиновнаның «Археология – пәнаралық өзара әрекеттестік алаңы ретінде» атты дәрісі өтті.

Дәріс барысында лектор заманауи археологияның дәстүрлі әдістерден шығып, басқа ғылым салаларының жетістіктерін белсенді түрде интеграциялап жатқанын көрсетті. Оған геология, палеогенетика, антропология, сондай-ақ ГИС-талдау, 3D-модельдеу және қашықтан зондтау сияқты цифрлық технологиялар кіреді. Ерекше назар пәнаралық ынтымақтастықтың ежелгі экологиялық жүйелерді қалпына келтіруге, халықтың көші-қонын анықтауға, материалдық мәдениетті талдауға және археологиялық ескерткіштердің хронологиясын нақтылауға қалай көмектесетініне аударылды.

Ирина Константиновна қазіргі археолог кең ауқымды құзыреттерге ие болып, басқа салалар мамандарымен өзара әрекеттесуге ашық болуы керектігін атап өтті. Дәріс студенттердің үлкен қызығушылығын тудырып, гуманитарлық саладағы пәнаралық зерттеулердің болашағы туралы әрі қарайғы талқылауға түрткі болды.