«Ұлт құқықтануының көшбасшысы Сұлтан Сартаев өмірі мен еңбектерін талдау»
9 желтоқсан 2025 жылы «Ел Тұтқа» пікірталас клубының мүшелері клуб жетекшісі Тлепбергенов Орынбасардың қатысуымен қазақ құқық ғылымының аса көрнекті тұлғаларының бірі – Сұлтан Сартаевич Сартаевтың өмір жолы мен ғылыми мұрасын талқылауға арналған арнайы пікірталас өткізді. Отырыстың негізгі мақсаты — ғалымның өмірбаянын жан-жақты зерделеу, оның құқық саласына қосқан үлесін бағалау және қазіргі құқықтық ғылымдағы маңызын айқындау болды.
Пікірталас барысында Сартаевтың өмір жолы кеңінен айтылды. Сұлтан Сартаевич Сартаев 1927 жылдың 15 қазанында Қызылорда облысы, Жаңақорған ауданындағы Яныкурган елді мекенінде дүниеге келген. Ол кеңестік және қазақстандық құқық ғылымының дамуына айрықша үлес қосқан белгілі ғалым, заң ғылымдарының докторы (1970), профессор (1972), Қазақстан Республикасының Ұлттық ғылым академиясының академигі (2002), Академия Президиумының мүшесі болды. Оның Қазақстан тарихындағы ең маңызды еңбектерінің бірі — 1993 жылғы тәуелсіз Қазақстанның алғашқы Конституциясын дайындаушылардың қатарында болуы.
Клуб мүшелері ғалымның кәсіби жолына тоқталып, оның мемлекеттану, конституциялық құқық, құқықтық реформа салаларындағы іргелі еңбектерін талқылады. Сартаевтың мемлекет құрылысының негіздерін қалыптастырудағы, құқықтық мемлекеттің қағидаларын орнықтырудағы рөлі ерекше атап өтілді. Оның ғылыми зерттеулері Қазақстандағы құқықтық ойдың қалыптасуына серпін беріп, заң ғылымының жаңа кезеңін бастауға ықпал етті.
Сонымен қатар, пікірталас барысында Сартаевтың ұстаздық қызметі, жас мамандарды тәрбиелеудегі еңбегі де сөз болды. Ол көптеген заңгер-ғалымдардың қалыптасуына ықпал еткен, елдің құқықтық мәдениетін арттыруға зор үлес қосқан тұлға ретінде бағаланды. Қатысушылар ғалымның еңбектері қазіргі уақытқа дейін өзектілігін жоғалтпағанын, құқықтық процестерді талдауда, мемлекет құрылымын түсінуде маңызды теориялық негіз болып қала беретінін атап өтті.
Отырыс соңында клуб мүшелері Сұлтан Сартаевич Сартаевтың ғылыми мұрасы — болашақ заңгерлер үшін сарқылмас білім көзі, елдің құқықтық мәдениетін дамытудың берік тірегі екендігін қорытындылады. Бұл талқылау жас заңгерлердің кәсіби дүниетанымын кеңейтіп, құқықтық ғылымға деген қызығушылығын арттырған маңызды шара болды.