«Жасанды интеллект: негіздері, тәуекелдері және жауапкершілігі» тақырыбындағы онлайн вебинар

2026 жылғы 17 қаңтар күні онлайн форматта «Жасанды интеллект: негіздері, тәуекелдері және жауапкершілігі» тақырыбында вебинар өтті. Аталған іс-шара қазіргі таңда қарқынды дамып келе жатқан цифрлық технологиялар мен жасанды интеллект жүйелерінің қоғамдағы рөліне, оларды қолданудың құқықтық және этикалық қырларына арналды.

          Бүгінгі таңда жасанды интеллект білім беру, медицина, экономика, құқық және мемлекеттік басқару салаларында кеңінен қолданылып келеді. Осыған байланысты оны жауапкершілікпен пайдалану, ықтимал тәуекелдерді алдын ала бағалау және құқықтық реттеу мәселелері ерекше маңызға ие. Вебинардың негізгі мақсаты — қатысушыларға жасанды интеллекттің мәнін түсіндіру және оның қолданылуына байланысты туындайтын өзекті мәселелерді талқылау болды.

          Іс-шараға заң факультетінің Азаматтық құқық және азаматтық іс жүргізу, еңбек құқығы кафедрасының меңгерушісі, з.ғ.д., профессор м.а.                 Балашов Талғат Төлеуұлы қатысып, тақырып аясында құқықтық сараптама жасады. Ол өз сөзінде жасанды интеллектті қолдану саласында құқықтық реттеу тетіктерін жетілдірудің маңыздылығын атап өтіп, болашақта бұл бағытта кешенді ғылыми және практикалық жұмыстардың қажеттігін жеткізді.

          Онлайн вебинардың негізгі спикері ретінде «Әділет» Жоғары құқық мектебінің сеньор-лекторы Сүлейменов Нариман Сапарұлы сөз сөйлеп, жасанды интеллекттің негізгі ұғымдарына, оның жұмыс істеу қағидаларына және құқық саласында қолданылу ерекшеліктеріне тоқталды. Спикер өз баяндамасында жасанды интеллект технологияларын пайдалану барысында азаматтардың құқықтары мен бостандықтарын қорғау, жеке деректердің қауіпсіздігі және заң алдындағы жауапкершілік мәселелеріне ерекше назар аударды.

          Сонымен қатар, баяндамашы автоматтандырылған жүйелер мен алгоритмдер арқылы қабылданатын шешімдердің заңдылығы, олардың адам өміріне әсері және мұндай жағдайларда жауапкершілікті айқындау мәселелері жөнінде пікір білдірді. Бұл мәселелер қазіргі құқықтық тәжірибеде өзекті болып табылатындықтан, қатысушылар тарапынан үлкен қызығушылық тудырды.

         Вебинар барысында қатысушылар жасанды интеллектті қолдану кезінде туындайтын құқықтық тәуекелдер, жауапкершілік шеңбері және цифрлық технологиялардың қоғамға ықпалы жөнінде жан-жақты ақпарат алды. Онлайн форматта ұйымдастырылған іс-шара интерактивті сипатта өтіп, тыңдаушылар тарапынан сұрақтар қойылып, пікір алмасу жүргізілді.

         Мұндай вебинарлар заманауи технологиялар мен құқық саласының өзара байланысын терең түсінуге, сондай-ақ білім алушылар мен мамандардың цифрлық сауаттылығын арттыруға ықпал етеді. Жасанды интеллектті жауапкершілікпен және құқықтық талаптарға сай қолдану — бүгінгі қоғамның маңызды міндеттерінің бірі болып табылады.