Әл-Фараби атындағы Қазақ ұлттық университеті Орталық Азиядағы цифрлық психология мен менталдық денсаулыққа арналған алғашқы халықаралық ғылыми журналды — Digital Psychology and Mental Health Technologies — іске қосады

26 қаңтар, 2026

Журнал цифрлық орта мен жасанды интеллекттің адам ойлауы, мінез-құлқы және психологиялық әл-ауқатына әсерін жүйелі түрде зерттеуге арналған. Бүгінгі таңда алгоритмдермен басқарылатын платформалар мен ЖИ технологиялары әлеуметтену, білім беру және кәсіби қызметтің негізгі факторларына айналып, олардың психологиялық ықпалын ерекше ғылыми және қоғамдық назар нысанына айналдырды.

Жоба Қазақстан Республикасының мемлекеттік саясатының басымдықтарымен тікелей үйлеседі. Президент Қасым-Жомарт Тоқаевтың Жолдауында цифрлық трансформация мен жасанды интеллектті енгізу ел дамуының стратегиялық бағыттары ретінде айқындалып, олардың психология ғылымын қоса алғанда, пәнаралық ғылыми сүйемелдеуді қажет ететіні атап өтілген.

Журнал төмендегі тақырыптар бойынша жарияланымдарға арналған халықаралық академиялық платформа болады:

• еңбек пен күнделікті өмірдегі жасанды интеллекттің психологиялық аспектілері, адам мен ЖИ агенттерінің өзара әрекеттесуі, жаппай мінез-құлыққа манипулятивтік ықпалдың салдары;

• цифрлық ортадағы мінез-құлық, интерфейстердің, жекешелендірудің және медиаплатформалардың санаға, эмоцияларға, цифрлық тәуелділік пен цифрлық күйзелуге әсері;

• цифрлық даму психологиясы, оқу үдерісін, метатану мен кәсіби бағдарды қолдау үшін жасанды интеллектті пайдалану;

• цифрлық диагностика, жеке тұлға және топ деңгейінде жағдайлар мен тәуекелдерді сенімді болжауға арналған цифрлық платформалар үшін валидті әдістемелерді әзірлеу және бейімдеу;

• психикалық үдерістерді зерттеу және түзету мақсатында нейроөлшемдер мен ми–компьютер интерфейстерін қолдану.

Басылым академиялық сапа мен жарияланым этикасының халықаралық стандарттарына сәйкес, ашық қолжетімділік және көптілді жарияланым үлгісі негізінде шығарылады.

Журналдың мақсатты аудиториясы: зерттеушілер мен оқытушылар, докторанттар мен магистранттар, білім беру, денсаулық сақтау және цифрландыру саласының мамандары, сондай-ақ психология, технология және менталдық денсаулық тоғысындағы халықаралық ғылыми орталықтар мен кәсіби қауымдастықтар.

Сізді және Сіздің әріптестеріңізді (соның ішінде шетелдік әріптестерді) ынтымақтастыққа шақырамыз — 2026 жылдың 1–4 нөмірлеріне жариялау үшін түпнұсқа ғылыми мақалалар дайындап, ұсынуға шақырамыз.

28 қаңтар, 2026

Басқа жаңалықтар