Ақпараттық технологиялар және жасанды интеллект факультетінде «Ғылымдағы әйелдер» воркшопы өтті

2026 жылғы 5 наурызда, Халықаралық әйелдер күні – 8 наурыз қарсаңында, Әл-Фараби атындағы Қазақ ұлттық университеті Ақпараттық технологиялар және жасанды интеллект факультетінде «Ғылымдағы әйелдер» тақырыбында воркшоп өтті. Іс-шара ғылым мен технология саласындағы әйелдердің рөлін арттыруға, олардың ғылыми зерттеулер мен инновациялық қызметке қосқан үлесін насихаттауға, сондай-ақ жас зерттеушілер мен студенттердің ғылымға деген қызығушылығын қолдауға бағытталды.

Воркшоптың ұйымдастырушысы - факультеттің Жасанды интеллект және Big Data кафедрасы, кафедра меңгерушісі Мансурова Мадина Есимханқызы. Аталған іс-шара ғылым мен білім беру саласында тәжірибе алмасуға, заманауи ғылыми бағыттарды талқылауға және халықаралық академиялық ынтымақтастықты нығайтуға арналған маңызды алаңға айналды.

Іс-шараны Ақпараттық технологиялар және жасанды интеллект факультеті деканының ғылыми-инновациялық жұмыс және халықаралық байланыстар жөніндегі орынбасары Бейсов Нұрбол Қанатұлы ашып, қатысушыларға құттықтау сөз сөйледі. Ол өз сөзінде қазіргі таңда ғылым мен инновацияның қарқынды дамуы жағдайында әйелдердің ғылыми зерттеулерге белсенді қатысуының маңыздылығы артып келе жатқанын атап өтті. Сонымен қатар, жасанды интеллект, деректер ғылымы, медицина және инженерия сияқты салаларда әйел ғалымдардың жетістіктері ғылымның дамуына зор үлес қосып отырғанын ерекше атап өтті.

Воркшоп барысында Қазақстан мен шетелдік жоғары оқу орындарының жетекші ғалымдары мен сарапшылары баяндама жасап, өз ғылыми тәжірибелерімен және зерттеу нәтижелерімен бөлісті. Атап айтқанда:

• Мансурова Мадина Есимханқызы - Жасанды интеллект және Big Data кафедрасының меңгерушісі;

• Тастанова Саида Алдиярқызы, PhD, Мұхаммед әл-Хорезми атындағы Ташкент ақпараттық технологиялар университетінің доценті (Ташкент, Өзбекстан);

• Қондыбаева Аида Мұратқызы, MD, PhD, FEAN - Неврология және қолданбалы нейроғылымдар ғылыми-білім беру орталығының жетекшісі, С. Д. Асфендияров атындағы Қазақ ұлттық медицина университеті;

• Токоева Бурул Жоробекқызы - И. Раззаков атындағы Қырғыз мемлекеттік техникалық университеті өкілі (Бішкек, Қырғызстан).

Баяндамалар барысында жасанды интеллект, деректерді талдау, нейроғылым, медициналық технологиялар және цифрлық инновациялар саласындағы заманауи ғылыми зерттеулердің нәтижелері мен болашағы талқыланды. Сонымен қатар, спикерлер ғылымдағы әйелдердің кәсіби дамуы, халықаралық ғылыми ынтымақтастық және ғылыми жобаларды жүзеге асыру мүмкіндіктері туралы өз пікірлерімен бөлісті.

Іс-шараға бакалавриат, магистратура және докторантура студенттері, профессор-оқытушылар құрамы, жас зерттеушілер мен ғылым саласының өкілдері қатысты. Қатысушылар баяндамашылармен пікір алмасып, ғылым мен технологияның қазіргі даму үрдістерін талқылауға мүмкіндік алды.

Воркшоп ғылымдағы гендерлік теңдікті ілгерілетуге, ғылыми қауымдастық арасындағы кәсіби байланыстарды нығайтуға және жастар арасында ғылым мен инновацияға деген қызығушылықты арттыруға бағытталған маңызды алаңға айналды. Сонымен қатар, мұндай іс-шаралар университеттің халықаралық ғылыми ынтымақтастықты дамытуға және жаңа буын зерттеушілерін қолдауға бағытталған стратегиялық мақсаттарына толық сәйкес келеді.